बार्सिलोना (एजेन्सी)– बार्सिलोनाले गए राती एथलेटिको बिल्बाओलाई ३–० ले हराउँदै स्पेनिस ला लिगामा शीर्षस्थानको रियल मड्रिडसँगको दुरीलाई छोट्याएको छ । रियलको ४६ अंक छ भने बार्सिलोनाको ४५ पुगेको छ । यद्दपी बार्सिलोनाले २१ खेल खेल्दा रियलले २ खेल कम खेलेको छ ।
घरेलु मैदानमा भएको खेलमा बार्सिलोनाको जितमा पाको अलकासेर, लियोनल मेस्सी र एलेक्स भिडालले गोल गरेका थिए ।
१८ औं मिनेटमा अलकासेरले पहिलो गोल गरे । पहिलो हाफमै मेस्सीले गोल थपे । ४० औं मिनेटमा मेस्सीले फ्रिकिकमा गोल गरेका हुन् । ६७ औं मिनेटमा भिडालले गोल गरेपछि बार्सिलोनाको जित सहज बनेको थियो । यो सिजन सबै प्रतियोगितामा गरि अन्तिम गोल बार्सिलोनाको त्यो सयौं गोल थियो ।
शनिबार ला लिगका अन्य खेलमा एट्लेटिको मड्रिडले लेगानेसलाई २–०, एइबरले भ्यालेन्सियालाई ४–० र इस्पानियोलले मालागालाई १–० ले हरायो । एन्टोनियो ग्रिजम्यान पेनाल्टीमा गोल गर्न चुकेको खेलमा फर्नान्डो टोरेसले दुई गोल गरेका थिए । टोरेसले पहिलो हाफ र दोस्रो हाफमा एक एक गोल गरे । एट्लेटिको ३९ अंकका साथ चौथो स्थानमा छ । समान ३२ अंकसहित इइबर सातौं र इस्पानियोल आठौं स्थानमा छन् ।
यसैबीच, शनिबारका लागि तय रियल मड्रिड र सेल्टा भिगो बीचको खेल हावाहुरीका कारण स्थगित भएको छ । हुरीबतासले सेल्टा भिगोको मैदानमा क्षेति पुगेकाले स्थागित गर्नु परेको बताइएको छ ।
