म्यानचेस्टर (एजेन्सी)– गाब्रियल जेसुसले इन्जुरी समयमा गोल गरेपछि प्रिमियर लिगमा म्यानचेस्टर सिटीले स्वान्सी सिटीलाई २–१ ले हराएको छ । इत्तिहाद रंगशालामा आइतबारको बराबरी उन्मुख खेलबाट जित निकालेसँगै सिटी अंक तालिकाको तेस्रो स्थानमा उक्लेको छ ।
शीर्षस्थानको चेल्सी भन्दा सिटी अझै १० अंकले पछाडी छ । पेप ग्वार्डिओलाको सिटीको ४९ र दोस्रो स्थानको टोटेनह्यामको ५० अंक छ । चौथो स्थानको आर्सनलको ४७ र पाँचौं स्थानको लिभरपुलको ४६ अंक छ । इन्जुरी समयको दोस्रो मिनेटमा डेभिड सिल्भाको क्रस ब्राजिलियन जेसुसले हेड गरे, तर उनको प्रहारलाई गोलकिपर लुकास फाबिन्स्कीले रोके । तर त्यसलाई उनले पूर्ण रुपमा नियन्त्रणमा लिन नसकेपछि छुटेको बलमा जेसुसले नजिकबाट ट्याप गर्दै टोलीर्लाइ जित दिलाएका थिए ।
११ औं मिनेटमा पनि जेसुसकै गोलमा सिटीले अग्रता लिएको थियो । तर खेल सकिन ९ मिनेटअघि ग्लेफी सिगुर्डसनले बराबरी गोल फर्काएका थिए । जेसुसको गोलपछि इन्जुरी समयको अन्त्य तिर सर्जियो अगुइरोले पनि गोलको मौका पाएका थिए, तर उनी सफल हुन सकेनन् । आइतबार नै साविक विजेता लेस्टर र म्यानचेस्टर युनाइटेडबीच प्रतिस्पर्धा हुदैछ ।
