काठमाडौं (हाम्रो खेलकुद)- टिप टप हेल्प नेपाल स्पोर्ट्स क्लबबाट यसै साता सुरु हुने काभा पुरुष क्लब भलिबल च्याम्पियनसिप खेल्न ३ पाकिस्तानी खेलाडी काठमाडौं आइपुगेका छन्।

पाकिस्तानी माजर अली, मुवासर राजा र अद्नान खानलाई काभाका लागि हेल्प नेपालले अनुबन्ध गरेको हो। यसअघि पनि उनीहरुले हेल्प नेपालबाट खेलिसकेका छन्।

त्रिभुवन अन्तर्राष्ट्रिय विमानस्थलमा उनीहरूलाई हेल्प नेपालका महासचिव अरुण श्रेष्ठले स्वागत गरेका थिए।

नेपालका २, भारत, माल्दिभ्स र इरानको‌ समान १ गरि ५ क्लबले त्रिपुरेश्वरस्थित राष्ट्रिय खेलकुद परिषद् (राखेप) मा मंसिर २२ देखि २९ गते सम्म हुने च्याम्पियनसिप प्रतिस्पर्धा गर्नेछन्।

आठौं प्रधानमन्त्री कप एनभिए लिगको विजेता हेल्प नेपाल स्पोर्टस क्लब, उपविजेता गण्डकी प्रदेश, भारतको क्यालिकट, माल्दिभ्सका एचडिसी क्लब र इरानको चादौरा मालोे क्लबले च्याम्पियनसिपमा भाग लिनेछन्।

च्याम्पियन्सिपमा सिंगल राउन्ड रोविन लिग, सेमिफाइनल, तेस्रो स्थान र फाइनल गरि १४ खेल हुनेछ।
काभाको यो वर्ष भलिबल संघले आयोजना गर्ने यो दोस्रो प्रतियोगिता हो ।

यसअघि साउनमा काभा महिला भलिबल नेसन्स लिग काठमाडौंमा भएको थियो। त्यसको उपाधि भारतले जितेको थियो भने नेपाल दोस्रो भएको थियो।च्याम्पियन्सिपको हाम्रो खेलकुद र कान्तिपुर म्याक्स एचडीबाट प्रत्यक्ष प्रसारण हुनेछ।