काठमाडौं (हाम्रो खेलकुद)- नेपाली राष्ट्रिय पुरुष भलिबल टिमका पूर्व कप्तान इम राना मगरले अन्तर्राष्ट्रिय भलिबलबाट सन्न्यास लिएका छन्।

काभा मेन्स भलिबल क्लब च्याम्पियनसिपमा फाइनलमा दौरान इनले औपचारिक रुपमा अन्तर्राष्ट्रिय भलिबलबाट सन्न्यास लिएका हुन् । सन्न्यास लिने क्रममा इमलाई राष्ट्रिय खेलकुद परिषद्का सदस्य सचिव टंकलाल घिसिङ र नेपाल भलिबल संघका अध्यक्ष जीतेन्द्रबहादुर चन्दमे इमलाई कोट लगाइदिदै, एक लाख रुपैयाँ र सम्मान पत्र प्रदान गरे ।

नेपाली भलिबलका सर्वाधिक सफल कप्तान इमले खेलाडीका‌ रुपमा दुई दशक भन्दा बढी समयदेखि सक्रिय छन् । उनकै कप्तानीमा नेपालले २०७३ सालमा सेन्ट्रल जोन काभा भलिबल च्याम्पियनसिपमा कास्य पदक जितेको थियो।

नेपाली पुरुष भलिबल टोलीले जितेको यो अहिलेसम्मकै एक मात्र अन्तराष्ट्रिय पदक हो। सन् २००६ बाट झन्डै डेढ दशक उनले राष्ट्रिय टोलीबाट खेलेका थिए।

पछिल्लो‌ पटक चीनको हवाङचाउमा भएको एसियन गेम्समा उनको नाम रहेपनि उनी बन्द प्रशिक्षणमा सहभागी भएनन् । यसयता उनले राष्ट्रिय टिमबाट खेलेका छैनन। आज औपचारिक रूपमा राष्ट्रिय टिमबाट उनले बिट मारे।

नेपाल पुलिस क्लबका कप्ता‌न समेत रहेका सेटर इमले घरेलु भलिबल लाई भने केहि समय निरन्तरता दिने बताएका छन् ।