काठमाडौं (हाम्रो खेलकुद)- केबी साम नेपाल कबड्डी लिग (एनकेएल) मा जनकपुर नाइट्सले हिमालयन रेडर्सलाई ३५-२४ हराउँदै विजयी सुरुवात गरेको छ।

राष्ट्रिय खेलकुद परिषदको कभर्ड हलमा शनिवार दोस्रो खेलको सुरुवात प्रतिस्पर्धात्मक भए पनि सहिद अन्सारीको सुपर रेडसँगै जनकपुरले ७-५ को अग्रता बनायो।

लगतै च्याफोन कामुन्नेको अर्को सुपर रेडमा जनकपुर १०-५ ले अगाडि बढ्यो। यसपछि हिमालयनलाई अल आउट गर्दै स्कोर १४-८ मा पुर्याउन सफल जनकपुरले पहिलो हाफमा ७ अंकको अग्रता बनायो। पहिलो हाफ १८-११ मा सकियो।

दोस्रो हाफमा पनि हिमालयन खेलमा फर्कन सकेन। जनकपुरले निरन्तर स्कोर गरि नै रहयो। दोस्रो पटक हिमालयनलाई अल आउट गर्दै जनकपुरले २७-१४ को फराकिलो अग्रता बनायो।

एक समय ३०-१५ ले अगाडि रहेको जनकपुर १५ अंकले अगाडि रहँदै जितलाई सहज बनायो। ३५-२४ को स्कोरमा खेल जितेको जनकपुरले ५ अंक बनायो।

जनकपुरले रेडबाट १४ स्कोर, ट्याकलबाट १७ र अल आउटबाट ४ स्कोर जोड्यो। पराजित हिमालयनले रेडबाट १७, ट्याकलबाट ७ स्कोर गर्दा अल आउट गर्न सकेन।

विराटनगर ब्यान्डिन्ट्स विजयी

एनकेएलमा विराटनगर ब्यान्डिन्ट्सले विजयी सुरूवात गरेको छ। विराटनगरले धनगढी वाइल्ड क्याट्सलाई ४६-३४ को स्कोरमा हराउँदै सहज जित निकालेको हो।

खेल अवधिभर दबाब बनाएको विराटनगरले सुरूवात देखि नै अग्रता बनायो। पहिलो हाफमा धनगढीलाई दुई पटक अल आउट गर्यो।

११-५ स्कोर गर्दा पहिलो पटक र २३-१४ को स्कोरमा दोस्रो पटक अल आउट गर्दा पहिलो हाफमा विराटनगरले २४-१६ को अग्रता बनायो।

यही लयलाई दोस्रो हाफमा पनि विराटनगरले निरन्तरता दियो। सुपर रेड अंकमा विराटनगरले दोस्रो हाफको सुरूवातमा २७-१७ को अग्रता बनायो।

१० अंकले पछि परेको धनगढीका स्टेफन एमोल्लोले सुपर रेड स्कोरमा अन्तरलाई २९-२३ मा झारे। तर यसपछि फेरि विराटनगर नै हाबी बन्यो। सहजै खेल ४६-३४ ले आफ्नो पक्षमा पार्यो।

विजयी विराटनगरले रेडबाट २४ स्कोर, ट्याकलबाट १८ र अल आउटबाट ४ स्कोर जोड्यो। धनगढीले भने रेडबाट २३ र ट्याकलबाट ११ स्कोर जोड्दा अल आउट गर्न सकेन। यस जितसँगै विराटनगरले ५ अंक बनाएको छ।

एनकेएलमा आइतवार पहिलो खेलमा विराटनगर ब्यान्डिट्स र काठमाडौं माभेरिक्सबीच प्रतिस्पर्धा हुनेछ। दोस्रो खेल पोखरा लेकर्स र हिमालयन रेडर्सबीच हुनेछ।
नेपालमा पहिलो पटक जारी फ्रेन्चाइज कबड्डी लिगमा कुल ६ टोलीको सहभागिता छ।