काठमाडौं (हाम्रो खेलकुद)- नवौं कृष्ण ध्वज स्मृति टेबुल टेनिस प्रतियोगिता अर्को साता आयोजना हुने भएको छ ।

रेड टायल्सको आयोजना र अखिल नेपाल टेबल टेनिस संघको तत्वावधानमा वार्षिक कार्यक्रम अन्तर्गत हुने प्रतियोगिता लैनचौर स्थित राष्ट्रिय टेबल टेनिस प्रशिक्षण केन्द्रमा माघ १५ गतेदेखि १८ सम्म सन्चालन हुने शुक्रवार पत्रकारमा जानकारी दिइयो ।

रेड टायल्सका अध्यक्ष सुरज केसीले‌ प्रतियोगितामा देशभरका विद्यालय, कलेज तथा क्लबहरुबाट ३ सय ५० खेलाडीर सहभागी हुने विश्वास व्यक्त गरे।

प्रतियोगितामा विद्यालय तर्फ यु-१० ब्वाइज सिंगल्स, यु-१० गर्ल्स सिंगल्स, यु-१२ व्वाइज सिंगल्स, यु-१२ गर्ल्स सिंगल्स, यु-१४ ब्वाइज सिंगल्स, यु-१४ गर्ल्स सिंगल्स, यु-१६ ब्वाइज र यु-१६ गर्ल्स सिंगल्स गरेर ८ स्पर्धा छन् भने कलेज तर्फ मेन्स सिंगल्स र लेडिज सिंगल्स गरेर २ स्पर्धा रहेको बताइएको छन् ।

मेन्स् भेट्रान्स ४० वर्ष माथि सिंगल्स स्पर्धा पनि समावेश गरिएको बताइएको छ। त्यसको विजेताले १० हजार , दोस्रो ५ हजार र तेस्रो हुनेले समान ३ हजार रुपैयाँ प्राप्त गर्नेछन्।

राष्ट्रिय खेलकुद परिषदका टेबल टेनिसका मुख्य प्रशिक्षक मोहनदास वासुकलाले खेलाडी उत्पादनका लागि विधालय स्तरको प्रतियोगिता महत्वपूर्ण रहने बताए।