काठमाडौं (हाम्रो खेलकुद)- राष्ट्रिय प्रतियोगिताका उप विजेता  पुरुषोत्तम सिलवालले श्रीलंका भएको अन्तर्राष्ट्रिय बुद्धिचाल प्रतियोगितामा फिडे क्याण्डिडेड मास्टरको टाइटल जितेका छन्। 

आफ्नै खर्चमा श्रीलंका पुगेका १७ वर्षे पुरुषोत्तमले अन्तर्राष्ट्रिय प्रतियोगितामा ९ चरणको प्रतिस्पर्धा मा ४.५ अंक जोडेर सिएम टाइटल प्राप्त गरेको नेपाल बुद्धिचाल महासंघले जनाएको छ।

वर्ल्ड चेस फेडेरेशन (फिडे) र एसियन चेस फेडेरेशन (एसिएफ) को तत्त्वावधान एवं श्रीलंका चेस फेडेरेसनको आयोजनामा भएको एसियन जोनल ३.२ चेस प्रतियोगिता नेपालीले मध्यम स्तरको खेल पस्केका छन्। 

आयोजक श्रीलंका सहित नेपाल, बंगलादेश, पाकिस्तान, माल्दिभ्स र भुटानका खेलाडी बिच भएको प्रतिस्पर्धा आज सकिएको हो।

२५ औं नेपाल च्याम्पियन रुपेश जैसवाल र १० औं महिला नेपाल च्याम्पियनको सिन्दिरा जोशीलाई बुद्धिचाल महासंघले सहभागी गराएका थियो । 
मास्टर रुपेशले ५ अंक जोडे । सिन्दिराले कमजोर खेल खेल्दै ३.५ मात्र जोडेकी छिन्। 

बंगलादेशका २४३१ रेटेड अन्तर्राष्ट्रिय मास्टर आईएम मनुन रेजा नीरले ७ अंकसहित उपाधि जिते। महिला विधा तर्फ बंगलादेशका २०९७ रेटेड अहमेद वादिफाले ७ अंक प्रोग्रेसिभ ४६ प्वाइन्टसहित उपाधि जितिन्।