काठमाडौं (हाम्रो खेलकुद)- नेपाल नम्बर एक प्रो भुवन नगरकोटी सूर्य नेपाल एनपिजिए म्याच-प्लेको क्वाटरफाइनलमा प्रवेश गरका छन्।

रोयल नेपाल गल्फ क्लबमा मंगलवार भुवनले १६ औं वरियताका पशुपति शर्माको चनौतीलाई सहजै पार गरे। उनले ५/४ ले खेल जिते।

चार होल अगाडि जित निकालेका भुवनले क्वाटरफाइनलमा धन बहादुर थापासँग खेल्नेछन्। यो सिजन भुवन उपाधि विहिन छन्। उनलाई सिजनको पहिलो उपाधि जित्ने दबाब पनि रहेको छ।

आठौं वरियताका धनलाई नवौं वरियताका भुवन कुमार रोक्काले कडा चुनौती दिए। १७ औं होल सम्म खेल बराबरीमा थियो। १८ औं होल जित्दै धनले बाजी मारे।

यो सिजन उच्च लयमा रहेका दोस्रो वरियताका प्रो निरज तामाङले १५ औं वरियताका सूर्य प्रसाद शर्मालाई कुनै पनि मौका दिएनन्। चार होल अगावै खेल ५/४ ले आफ्नो पक्षमा पारे।

निरज यो सिजन तेस्रो उपाधि जित्ने दाउमा छन्। निरजले भोलि सातौं वरियताका भेट्रान रामे मगरसँग प्रतिस्पर्धा गर्नेछन्। रामेले १० औं वरियताका दीपक मगरलाई ४/३ ले हराए। भाईसँग पराजित दीपक पहिलो चरणबाट बाहिरिए।

डिफेन्डिङ च्याम्पियन तथा तेस्रो वरियताका दिनेश प्रजापति सहज जितका साथ क्वाटरफाइनलमा पुगे। उनले १४ औं वरियताका रमेश अधिकारीलाई ४/३ ले माथ दिए। उनले अब अनुभवी तोरण विक्रम शाहीको सामना गर्नेछन्।

सूर्य नेपाल टुर च्याम्पियनसिपका विजेता तथा ११औं वरियताका तोरणले छैटौं वरियताका जयराम श्रेष्ठलाई ३/२ को हार चखाए।

अर्को खेलमा चौथो वरियताका रवि खड्काले १३ औं वरियताका टंक बहादुर कार्कीलाई ३/२ को नतिजमा पराजित गर्दै अन्तिम आठमा स्थान बनाए।

रविले भोलि १२औं वरियताका प्रदीप कुमार लामासँग खेल्नेछन्। प्रदीपले पाँचौ वरियताका सञ्जय लामा विरूद्ध २/१ को अप्रत्याशित नतिजा निकाले।

सन् २०२३-२४ को अर्डर अफ मेरिटको आधारमा १६ प्रोफेसनल गल्फरले प्रतिस्पर्धा गरेका हुन्।

प्रतियोगिताको पुरस्कार राशी २ लाख ५० हजार रुपैयाँ रहेको छ। उपाधि विजेताले ६० हजार रुपैयाँ प्राप्त गर्नेछन।

भोलि क्वाटरफाइनल र सेमिफाइनल खेल १८/१८ होलको हुनेछ। फाइनल र तेस्रो स्थानको लागि बिहिवार प्रतिस्पर्धा हुनेछ। फाइनल ३६ होलको हुनेछ।