काठमाडौं (हाम्रो खेलकुद)- दोस्रो वरीयताका निरज तामाङ र आठौं वरीयताका धन बहादुर थापाले सूर्य नेपाल एनपिजिए म्याच-प्लेको उपाधिका लागि भिड्ने भएका छन्।

रोयल नेपाल गल्फ क्लबमा आज भएको सेमिफाइनल भिडमा निरजले साविक विजेता दिनेश प्रजापतिलाई १७ औं होलमा ३/२ ले माथ दिंदै फाइनलमा स्थान बनाए ।
त्यसअघि निरजले भेट्रान रामे मगरको चुनौती ३/२ ले पन्छाएका थिए।

लगातार दोस्रो पटक उपाधि जित्ने दाउमा रहेका दिनेशले क्वाटरफाइनलमा ११औं वरीयताका अनुभवी तोरण विक्रम शाहीलाई १८ औं होलमा माथ दिए। तर सेमिफाइनलमा निरजसँग भोगेको हारमा तेस्रो स्थानको लागि खेल्नुपर्ने भएको छ।

दोस्रो सेमिफाइनलमा आठौं वरीयताका धन बहादुर थापाले चौथो वरीयताका रवि खड्कालाई ३/२ ले हराउँदै निरजलाई फाइनलमा प्रतिद्वन्द्वी भेट्टाए।

धनले क्वाटरफाइनलमा नेपाल नम्बर एक गल्फर भुवन नगरकोटीलाई स्तब्ध बनाएका थिए। १८ औं होलसम्म खेल बराबरीमा थियो। यसपछि १९ औं होलमा पहिलो वरीयताका भुवनलाई माथ दिंदै धनले सेमिफाइनलको यात्रा तय गरेका थिए।

रविले प्रदीप कुमार लामालाई ३/२ ले हराउँदै सेमिफाइनलमा स्थान बनाए । रवि र भुवनले भोलि तेस्रो स्थानको लागि प्रतिस्पर्धा गर्नेछन्।

सिजनको तेस्रो उपाधि जित्ने दाउमा रहेका धरानका प्रो निरज र धनबीच भोलि उपाधिका लागि ३६ होलको प्रतिस्पर्धा हुनेछ।

सन् २०२३-२४ को अर्डर अफ मेरिटको आधारमा १६ प्रोफेसनल गल्फरले प्रतिस्पर्धा गरेका हुन्।

प्रतियोगिताको कुल पुरस्कार राशी २ लाख ५० हजार रुपैयाँ छ। उपाधि विजेताले ६०, दोस्रोले ४२ , तेस्रोले ३२ र चौथोले २४ हजार रुपैयाँ प्राप्त गर्नेछन् ।