काठमाडौं (हाम्रो खेलकुद)-  नेपाल पुलिस क्लबका रविन चन्द‌ र एपिएफ क्लबकी निरुता ठगुन्नाले पाँचौं एनभिए अवार्ड २०८१ को उत्कृष्ट खेलाडीको अवार्ड प्राप्त गरेका छन् । दुवैले अवार्डसँगै समान ५० हजार रुपैयाँ प्राप्त गरे।

नेपाल भलिबल संघले शुक्रवार आयोजित गरेको पाँचौं एनभिए अवार्डमा उनीहरु अवार्ड प्रदान गरिएको हो । उदीयमान पुरुष खेलाडीको अवार्ड पुलिस क्लबका पहल गहतराज र महिला तर्फ न्यू डायमन्ड क्लबकी सुमित्रा रेग्मीलाई प्रदान गरिएको छ। दुवैले समान ५० हजार रुपैयाँ पाए ।

यसैगरी एपिएफका महेश चौधरी पुरूष टिमका  र पुलिस क्लबका रुपेश विष्ट महिला टिमका उत्कृष्ट प्रशिक्षक बन्न सफल रहे। उनीहरूले पनि जनही ५० हजार रुपैयाँ प्राप्त गरे। टिम अफ द इयरमा पुरुषतर्फ एपिएफ र महिलातर्फ नेपाल पुलिस क्लबले २-२ लाख रुपैयाँ प्राप्त गरे । त्यस्तै गत वर्ष काभा यू-२० च्याम्पियनसिपमा दोस्रो बन्न सफल पुरुष टोलीलाई ४ लाख ५० हजार रुपैयाँ प्रदान गरियो ।

महिला राष्ट्रिय टोलीको पूर्व कप्तान विनिता बुढाथोकीलाई पनि संघले सम्मान गरेको छ । उनलाई ५० हजार रुपैयाँ सहित सम्मान गरिएको हो । पूर्व खेलाडीलाई पनि संघले यो अवार्डमा सम्मान गर्ने गरेको छ । मेरो खेलकी लक्ष्मी शाक्यलाई ५० हजार रुपैयाँ सहित पत्रकारिता पुरस्कार प्रदान गरियो ।

संघले कार्यक्रममा ५० वर्षपछि जापानबाट नेपाल आएका पूर्व भलिबल प्रशिक्षक हारोउ हैसोलाई पनि सम्मान गर्यो ।

संघले आयोजनामा २०८० को प्रदर्शनको आधारमा खेलाडी, प्रशिक्षक तथा खेल व्यक्तिवहरूलाई सम्मान गरेको हो। संघले छनौट समिति गठन गरेर अवार्ड प्राप्त गर्ने खेलाडीहरू चयन गरेको हो ।