पोखरा (हाम्रो खेलकुद)- प्रथम लायन्स कप आमन्त्रित पुरुष भलिबल प्रतियोगितामा इरानको‌ टोली सेमिफाइनलमा प्रवेश गर्न सफल भएको छ।

पोखरा रंगशालास्थित बहुउद्देश्यीय कभर्ड हलमा आज भएको खेलमा इरानको टोलीले गण्डकी प्रदेशलाई ३-१ ले हराउँदै सेमिफाइनलको यात्रा तय गरेको हो।

इरानको टिमले सुरूवात राम्रो गर्यो। पहिलो सेट २५-१४ ले जित्यो। तर घरेलु टोली गण्डकीले खेलमा फर्कने संकेत देखायो। दोस्रो सेटमा पकड बनायो। इरानको टिमले यो सेट १७-२५ ले गुमायो। गण्डकीले खेललाई एक-एकको बराबरीमा पुर्यायो।

तर गण्डकीले यो लयलाई निरन्तरता दिन सकेन्। बाकी दुई सेटमा इरानको टिम हाबी रहयो। २५-१८ र २७-२५ ले तेस्रो र चौथो सेट जित्दा इरानले ३-१ को सहज जित दर्ज गर्यो।

इरानी टीमको यो दोस्रो जित हो। यसअघि शसस्त्र प्रहरी बल (एपीएफ) लाई ३-१ को सेटमा हराएको थियो। समूह ‘ए’ अन्तर्गत अन्तिम खेल गण्डकी प्रदेश र एपिएफबीच हुनेछ । उक्त खेलको विजेताले सेमिफाइनलमा स्थान सुरक्षित गर्नेछ ।

प्रतियोगितामा सहभागी ६ टोलीको सहभागीता रहेको छ। समूह ‘ए’ मा इरानी टोली, एपीएफ र गण्डकी प्रदेश छन् । समूह ‘बी’ मा भारतीय टोली, त्रिभुवन आर्मी क्लब र नेपाल पुलिस क्लब रहेका छन् । दुवै समूहबाट शीर्ष दुर्ई टोली सेमिफाइनलमा पुग्ने नियम रहेको छ।

प्रतियोगिताको विजेताले ४ लाख ४४ हजार ४ सय ४४ र उपविजेताले २ लाख ४४ हजार ४ सय ४४ रुपैयाँ नगद पुरस्कार प्राप्त गर्नेछन्।

सर्वोत्कृष्ट खेलाडीलाई १४ हजार ४ सय ४४ र विधागत तर्फ उत्कृष्ट हुनेहरूलाई ८ हजार ४ सय ४४ रुपैयाँ प्रदान गरिनेछ।