काठमाडौं (हाम्रो खेलकुद) – विभागीय टोली त्रिभुवन आर्मी क्लबले राष्ट्रिय पुरुष हक्की प्रतियोगिताको उपाधि जितेको छ । उपाधिसँगै आर्मीले ७५ हजार रुपैयाँ प्राप्त गर्यो

ललितपुरस्थित च्यासल फुटबल मैदानमा बुधबार सम्पन्न फाइनलमा आर्मीले गण्डकी प्रदेशलाई २–० ले हराउँदै उपाधि उचालेको हो । आर्मीको जितमा राजेन्द्र कार्की र अम्बरबहादुर गुरुङले गोल गरे । दुवै हाफमा समान एक गोल भयो ।

खेलको २२औं मिनेटमा राजेन्द्रले गोल गर्दै अग्रता दिलाए । दोस्रो हाफको ४३औं मिनेटमा अम्बरबहादुरले गोल गर्दै अग्रता दोब्बर बनाए । आर्मीका राजेन्द्र नै प्लेयर अफ द म्याच भए । गण्डकीले ५० हजार रुपैयाँमा चित्त बुझायो ।

प्रतियोगिताको इमर्जिङ प्लेयर एपिएफका पवन माओ, बेस्ट डिफेन्डर रन्जित राउत र बेस्ट किपर गण्डकीका जोशन राई घोषित भए । बेस्ट स्कोरर आर्मीका काशिराज राई र राजेन्द्र कार्की भए । दुवैले समान ६ गोल गरेका थिए । आर्मीका देवसिंह धामी प्लेअर अफ द टुर्नामनेन्ट घोषित भए ।

प्रतियोगितामा नेपाल पुलिस क्लबले तेस्रो स्थानमा रहेर २५ हजार रुपैयाँ प्राप्त गर्यो । विभागीय डर्बीमा पुलिसले एपिएफलाई ३–० ले हराएको हो । शंकर घर्तिमगर दुई गोल तथा मिलन तामाङले एक गोल गरे । शंकरले तेस्रो मिनेटमा नै गोल गर्द पुलिसलाई अग्रता दिलाए । ३०औं मिनेटमा मिलनले गोल गर्दै पुलिसको अग्रता दोब्बर बनाए । दोस्रो हाफमा पुलिसले तेस्रो गोल गर्यो । ५७औं मिनेटमा शंकरले व्यक्तिगत दोस्रो गोल गरेपछि पुलिसले सहज जित निकाल्यो । गण्डकीका प्रेम विक प्लेयर अफ म्याच भए ।

पुरुषमा शीर्ष तीन स्थान हात पार्ने टिमले क्रमशः ७५ हजार, ५० हजार र २५ हजार नगद पुरस्कार प्राप्त गरे । महिलातर्फ पनि आर्मी नै च्याम्पियन बनेको थियो ।