काठमाडौं, जेठ २७ – नेपाल इ-स्पोर्ट्स संघ (इसान) को आयोजनामा सम्पन्न अन्तर्राष्ट्रिय प्रतिस्पर्धा पब्जी मोबाइल एसियन शोडाउन २०२५ को उपाधि पाकिस्तानले जितेको छ ।

तीन दिनसम्म चलेको रोमाञ्चक प्रतिस्पर्धाको अन्तिम दिन पाँच खेल सम्पन्न हुँदा पाकिस्तानले आफ्नो खेलमा उल्लेखनीय सुधार गर्दै कुल १५ खेलमा १७३ अंक जोड्न सफल भयो । दोस्रो दिनसम्म शीर्ष स्थानमा रहेको इन्डोनेसियालाई पछि पार्दै पाकिस्तान उपाधि जित्न सफल रह्यो । अन्तिम दिन पाकिस्तानले दुई चिकेन डिनर जित्दै इन्डोनेसियालाई चार अंकले पछि पारेको हो ।

इन्डोनेसियाले १६९ अंकमा प्रतियोगिता समाप्त गर्‍यो । अन्तिम दिनमा अपेक्षाकृत प्रदर्शन हार्न नसक्दा उपाधि हातबाट फुस्किएको हो । नेपाल ब्लु टोलीले अन्तिम दिनमा उत्कृष्ट लयमा फर्किँदै तेस्रो स्थान हासिल गर्यो । टोलीले अन्तिम दिन दुई वटा चिकेन डिनर जित्दै १५४ अंक जोड्यो । उपाधि जित्ने सम्भावना देखिएपनि अन्तिम खेलमा आवश्यक अंक जुटाउन नसक्दा नेपाल ब्लु तेस्रो स्थानमै सिमित भयो ।

नेपाल रेड टोलीले ११८ अंक, मलेसियाले ११२ अंक, र जोर्डनले ९० अंक जोड्दै क्रमशः शीर्ष ६ स्थानमा समापन गरे । प्रतियोगितामा सबैभन्दा कमजोर प्रदर्शन लेबननले गरेको थियो, जसले जम्मा २१ अंक मात्र जोड्न सक्यो ।

प्रतियोगितामा सर्वोत्कृष्ट खेलाडीको उपाधि पाकिस्तानका फलकले प्राप्त गरे । उनले सम्पूर्ण प्रतियोगिताभरमा निरन्तर आक्रामक र निर्णायक भूमिका निर्वाह गर्दै आफ्नो टोलीलाई जिततर्फ डोर्याएका थिए । उत्कृष्ट व्यक्तिगत प्रदर्शनका आधारमा तयार पारिएको सूचीमा पाकिस्तानका तीन र नेपालका दुई खेलाडी समावेश भएका छन् ।

प्रतियोगितामा १४ राष्ट्रका टोलीहरूको सहभागिता रहेको थियो, जसमा नेपालबाट नेपाल ब्लु, नेपाल रेड र नेपाल व्हाइट गरी तीन टोलीहरूले प्रतिस्पर्धा गरेका थिए ।

प्रतियोगिताको सफल समापनपछि इसानका अध्यक्ष अञ्जन धमलले एसियाका खेलाडीलाई एउटै मञ्चमा प्रतिस्पर्धा गर्न सक्ने अवसर दिएर एउटा नयाँ इतिहास निर्माण गरेका बताए । उनले आगामी दिनमा अझ ठूलो र भव्य प्रतियोगिता गर्ने योजनामा रहेको जानकारी दिए ।