ललितपुर (हाम्रो खेलकुद)- ललितपुर जिल्ला बुद्धिचाल संघमा अध्यक्ष विक्रम श्रेष्ठसहित ९ सदस्यीय कार्यसमिति निर्विरोध चयन भएको छ।

ललितपुरको ६ वटा पालिकाका प्रतिनिधि एवं कार्य समितिले २ वर्षका लागि कार्यसमिति चयन गरेको नेपाल बुद्धिचाल महासंघले जनाएको छ।

महासंघका उपाध्यक्ष श्याम ब्यञ्जनकारको प्रमुख आतिथ्यतामा सम्पन्न साधारणसभाबाट उपाध्यक्षमा सजिन महर्जन, सचिवमा हरिकृष्ण श्रेष्ठ, कोषाध्यक्षमा रञ्जन घोषाल चयन भएका छन्। 

सदस्यमा मनु सिं दानी, समिर रञ्जितकार, कृजन महर्जन, प्रसन्न महर्जन र रोजिल श्रेष्ठ चयन भए ।

ललितपुर जिल्ला खेलकुद विकास समितिका कार्यालय प्रमुख बाबुकाजी श्रेष्ठको रोहवरमा साधारणसभा भएको थियो। निर्वाचित पदाधिकारी र सदस्यलाई निर्वाचन संयोजक निशा महर्जनले प्रमाणपत्र प्रदान गरिन् ।  

संघको साधारण सभामा महासंघका केन्द्रीय प्रतिनिधि राजु ताम्राकार, केन्द्रीय सदस्य सुशील चौधरी, केन्द्रीय सदस्य रमिला पोखरेल लगायतले बधाई तथा शुभकामना दिए । 

आजै काठमाडौं जिल्ला बुद्धिचाल संघले केशव श्रेष्ठको नेतृत्वमा साधारणसभा सम्पन्न गरेको छ। भोलि नुवाकोट, भक्तपुर लगायतका जिल्लाहरुमा अधिवेशन हुने महासंघले जनाएको छ। 

महासंघले आफ्ना ५५ सदस्य जिल्लालाई जेठ ७ गते भित्र अधिवेशन सम्पन्न गर्न परिपत्र गरेको छ ।