आर्मी र कोशी विजयी

पोखरा (हाम्रो खेलकुद)- त्रिभुवन आर्मी क्लब र कोशी प्रदेशले नवौं पिएम कप एनभिए लिगको आ-आफ्नो अन्तिम खेलमा जित निकालेका छन्।

पोखराको कभर्ड हलमा पुरुषतर्फ आर्मीले सुदूर पश्चिम प्रदेशलाई २५-२२, २५-२२ र २५-१८ को सहज नतिजामा हराउँदै पाँचौं जित आफ्नो पक्षमा पार्यो।

यो जितमा आर्मीले १४ अंक बनाएको छ। आर्मीले तेस्रो स्थानको लागि पुलिससँग खेल्ने हिजो न तय भैसकेको छ।

सुदूरको लागि भने निराशाजनक रहयो। लगातार सातौं हारमा लिगको पुछारमा रहँदै बाहिरिएको छ।
यसैगरी बाहिरिसकेका मणिमुकुन्द र कोशी प्रदेशको प्रतिस्पर्धामा कोशीले जित निकाल्यो।

कोशीले २५-२२, २५-२३ र २५-१५ को जितका साथ लिगको अन्त्य गर्यो। उसको यो दोस्रो जित हो। मणिमुकुन्द र कोशीले यो लिगमा समान ७ अंक जोडे। पुरुषतर्फको फाइनलमा गण्डकी र हेल्प नेपालले खेल्ने निश्चित भैसकेको छ।

महिलातर्फ एभरेष्ट भलिबल क्लबले नेपाल एपिएफ‌ क्लबलाई ३-० ले हरायो । एपिएफ र एभरेष्टबीच नै भोलि तेस्रो स्थानको खेल हुनेछ। पुलिस र टिप‌ टप न्यु डायमण्डबीच फाइनल हुनेछ।