पोखरा (हाम्रो खेलकुद)- साविक विजेता टिप टप हेल्प नेपाल नवौं पिएम कप एनभिए लिगको पुरुषतर्फ उपाधि रक्षा गरेको छ। हेल्प नेपालको यो पाँचौं एनभिए लिग उपाधि हो।

आज हेल्प नेपालले सानदार पुनरागमन गर्दै घरेलु टोली गण्डकी प्रदेशलाई ३-२ ले हराउँदै लगातर तेस्रो पटक उपाधि जिन सफल रहयो। यो जितमा हेल्प नेपाल माल्दिभ्समा हुने काभा क्लब च्याम्पियनसिपमा समेत छनोट भएको छ। गत वर्ष नेपालमा आयोजना भएको काभा क्लब च्याम्पियन्समा हेल्प नेपाल र गण्डकीले नै प्रतिस्पर्धा गरेका थिए।

खचाखच दर्शकले भरिएको पोखराको कभर्ड हलमा गण्डकी गत फाइनलको हारको बदला लिने दाउमा थियो। सोही अनुरुप उत्कृष्ट सुरुवात गर्यो। २५-२० र २७-२५ ले लगातार दुई सेट जित्दै जितको नजिक पुगेको थियो।

अब गण्डकीलाई मात्र एक सेट जिते पुग्थ्यो। तर हेल्प नेपालले त्यसो हुन दिएन । सानदार कमब्याकका साथ बाँकी तीन सेट २५-२२, २५-१४ र १५-८ ले आफ्नो पक्षमा पार्दै हेल्प नेपाल च्याम्पियन बन्यो ।

यो हारमा गण्डकी यो पटक पनि पिएम कप एनभिए लिगको उपाधि जित्न असफल भयो‌। लगातार तेस्रो पटक उपाधि जितेको हेल्प नेपालले यसअघि तेस्रो र पाँचौं संस्करणमा पनि उपाधि हात पारेको थियो।

पुलिसको ह्याट्रिक

महिलातर्फ टिप टप न्यु डायमण्ड युथ स्पोर्टस एकेडेमीलाई ३-१ ले हराउँदै पुलिस उपाधि रक्षा गर्न सफल भयो। पुलिसले लगातार तेस्रो पटक उपाधि जित्दै ह्याट्रिक गरेको छ।

पुलिस र न्यु डायमण्ड नेपालमा हुने काभा महिला क्लब च्याम्पियनसिपमाका लागि छनोट भएका छन्।‌

उत्कृष्ट लयमा रहेको पुलिसले राम्रो सुरुवात गर्यो। २५-२० ले पहिलो सेट जित्यो। तर न्यु डायमण्डलरे दोस्रो सेटमा कमब्याक गर्यो। पुलिसले यो सेट २२-२५ ले गुमायो। खेल १-१ को बराबरीमा पुग्यो।

तेस्रो सेट निकै प्रतिस्पर्धामक बन्यो। जहाँ पुलिसले २८-२६ ले बाजी मार्यो। २-२ ले अगाडि बढेको पुलिसले चौथो सेौ सहजै २५-१४ ले जित्दै लगातार तेस्रो पटक उपाधि जित्यो।

लिग चरणमा पनि पुलिसले न्यु डायमण्डलाई ३-० ले हराएको थियो। पुलिस लिगको शीर्षस्थानमा रहँदै र न्यु डायमण्ड दोस्रो हुँदै फाइनलमा पुगेका थिए।

महिला र पुरुष दुवैतर्फको विजेता हेल्प नेपाल र नेपाल पुलिसले समान ८ लाख, दोस्रो भएका गण्डकी र न्यु डायमण्डले समान ४ लाख प्राप्त गरे। यस्तै तेस्रो हुने पुलिस र एभरेष्ट भलिबल क्लबले २ लाख रुपैयाँ प्राप्त गरे ।

नेपाल भलिबल संघको आयोजनामा जेठ ८ गते सुरु भएको लिगमा महिलातर्फ ६ र पुरुषतर्फ ८ टोलीको सहभागिता छ।