पोखरा (हाम्रो खेलकुद)- एभरेष्ट भलिबल क्लब र एपिएफ क्लबले प्रचण्ड कप राष्ट्रिय महिला भलिबल प्रतियोगिताको सेमिफाइनलमा पुगेका छन् ।

समूह चरणको अन्तिम खेलमा जित निकाल्दै दुवै टोलीले सेमिफाइनलमा स्थान पक्का गरेका हुन् ।
पोखरास्थित कभर्डहलमा बिहीवार गण्डकी प्रदेश भलिबल संघमाथि पुनरागमन जित निकाल्दै एभरेष्टले सेमिफाइनल पक्का गर्यो । एभरेस्टले गण्डकीलाई ३–१ को सेटमा हरायो ।

पहिलो सेटमा गण्डकीले २५–२१ ले जित निकालेपनि एभरेष्टले सुधारिएको प्रर्दशन गर्दै २५–१४, २५–२२ र २५–१४ को नतिजा निकाल्यो ।

तेस्रो दिनको पहिलो खेलमा एपिएफले स्टेप रामपुरलाई ३–० को सोझो सेटमा हरायो । एपिएफले अन्तिम चारमा स्थान बनाउने क्रममा रामपुलाई २५–६, २५–६ र २५–७ को सेटमा हरायो ।

प्रतियोगिता अन्तर्गत शुक्रवार सेमिफाइनलका खेलहरु हुनेछन् । पहिलो सेमिफाइनलमा पुलिस र एभरेष्ट तथा दोस्रो सेमिफाइनलमा टिप टप न्यु डायमण्ड र एपिएफ भिड्ने समिकरण बनेको छ ।

प्रतियोगिताको विजेताले ६ लाख रुपैयाँ, उपविजेताले ३ लाख रुपैयाँ र तेस्रो हुने टिमले एक लाख रुपैयाँ प्राप्त गर्नेछन् ।

सर्वोत्कृष्ट खेलाडीले ३० हजार र विधागततर्फका उत्कृष्ट खेलाडीले जनही २० हजार रुपैयाँ प्राप्त गर्ने आयोजक नेशनल स्पोर्ट्स एकेडेमीले जनाएको छ ।