काठमाडौं (हाम्रो खेलकुद) – पूर्व नम्बर एक प्रो गल्फर रवि खड्का सूर्य नेपाल प्रिमियर गल्फ च्याम्पियनसिपको पहिलो दिन एक स्ट्रोकको अग्रता सहित शीर्षस्थानमा रहेका छन् ।

रविले ५-अन्डर ६७ को स्कोर जोड्दै साविक विजेता सुभाष तामाङलाई १ स्ट्रोकले पछि पारेका हुन् । गोकर्ण गल्फ क्लबमा सोमबार रविले छैटौं देखि नवौं होलसम्म लगातार चार बर्डी प्रहार गरे । यही चार बर्डीको मद्दतले फ्रन्ट नाइन ४-अन्डर ३२ मा सकाए । बोगी रहित फ्रन्ट नाइन खेलेका उनले १२औं र १७औं होलमा एक-एक सट बचाए । १३औं होलको बर्डीले ब्याक नाइन १-अन्डर ३५ मा पुरा गरे ।

व्यावसायिक गल्फ टुर खेलिरहेका सुभाष ४-अन्डर ६८ को स्कोरमा दोस्रो स्थानमा रहे । उनले फ्रन्ट नाइन १-ओभर ३७ को स्कोर बनाए । छैटौं होलमा बर्डी प्रहार गरेपनि पाँचौं र सातौं होलमा एक-एक सट खेर फाले । तर ब्याक नाइनमा भने लय समाते । बोगीरहित ब्याक नाइन खेल्ने क्रममा १०औं, १२औं र १६औं होलमा बर्डी प्रहार गरे । ५-पारको १५औं होलमा इगलको सफलतासँगै ब्याक नाइन ३१ मा सकाए । उनले गत सिजको यही प्रतियोगिता जितेपछि घरेलु टुर खेलेको यो पहिलो पटक हो ।

३-अन्डर ६९ को नतिजामा दुई एमेच्योर निम दोर्जी तामाङ, राहुल विश्वकर्मा तथा प्रो गल्फर भुवन नगरकोटी र धन बहादुर थापाले संयुक्तरुपमा तेस्रो स्थानमा रहे ।

२-अन्डर ७० स्कोर गरेका निरज तामाङ र विष्णु प्रसाद शर्मा संयुक्तरुपमा सातौं स्थानमा छन् । १-अन्डर ७१ स्कोर गरेका दीपक मगर, राम कृष्ण श्रेष्ठ र एमेच्योर वाङ्चेन ढोन्डुपले पहिलो दिनको खेल संयुक्तरुपमा नवौं स्थानमा पुरा गरे ।

एमेच्योरतर्फ भुटानका निम दोर्जी र नेपालका राहुल संयुक्तरुपमा शीर्षस्थानमा रहे । उनीहरूले ३-अन्डर ६९ को स्कोरमा बाङ्चेनले २ स्ट्रोकले पछि पारे ।

निमले तेस्रो र सातौं होलमा इगल प्रहार गरे। छैटौं होलमा एक सट बचाए। पहिलो र आठौं होलमा बोगीको सामना गर्दा फ्रन्ट नाइन ३-अन्डर ३३ मा पुरा गरे। यसपछि ११औं र १४औं होलमा बर्डी तथा १५औं र १८औं‌ होलमा बोगी खेपे। ब्याक नाइन इभन-पार ३६ खेले ।

राहुलले फ्रन्ट नाइन १-अन्डर ३५ तथा ब्याक नाइन २-अन्डर ३४ मा सकाए। उनले कुल ५ बर्डी र दुई बोगी प्रहार गरे। वाङ्चेनले १-अन्डर ७१ स्कोर गरे। वाङ्वेनले सातौं होलमा चार सट खेर फाले। उनले ६ बर्डी प्रहार गर्दा एक बोगी खेपेका थिए ।

उपाधि दावेदार मानिएका एमेच्योर सद्भाव आचार्य इभन पार ७२ स्कोर जोडेका छन् । उनले सातौं होलमा डबल बोगी खेपेका थिए ।

नेपाल प्रोफेसनल गल्फर्स एसोसिएसनद्वारा आयोजित चार दिने प्रतियोगितामा ३७ जना प्रोफेसनल गल्फरले हालसम्मकै सर्वाधिक १६ लाख नगद पुरस्कार राशीको लागि दाबेदारी प्रस्तुत गरिरहेका छन् । विजेताले उपाधि सहित ३ लाख नगद पुरस्कार प्राप्त गर्नेछन् । दोस्रो हुने खेलाडीले १ लाख ८५ हजार, तेस्रोले १ लाख २५ हजार, चौथोले १ लाख ५ हजार र पाँचौं हुनेले ९२ हजार रुपैयाँ हात पार्नेछन् । शीर्ष २१ भित्र रहने सबै खेलाडी नगद पुरस्कारको हकदार बन्नेछन् । साथै प्रतियोगितामा १८ जना एमेच्योर खेलाडीहरू पनि प्रतिस्पर्धा गरिरहेका छन् ।

चार दिने प्रतियोगितापछि असार ७ गते (शनिबार) प्रो-एम प्रतियोगिता हुनेछ । जहाँ २५ जना प्रोफेसनल र १०० जना कर्पोरेटस्तरका एमेच्योर खेलाडीले भाग लिनेछन् ।