काठमाडौं (हाम्रो खेलकुद) – राष्ट्रिय टिमका सदस्य एमेच्योर राहुल विश्वकर्मा सूर्य नेपाल प्रिमियर गल्फको तेस्रो दिन एक स्ट्रोकको अग्रतासहित शीर्षस्थानमा रहेका छन् ।

समग्रमा १६-अन्डर २ सयको स्कोरमा राहुलले प्रो गल्फर तथा दोस्रो दिनका संयुक्त लिडर सुभाष तामाङलाई एक स्ट्रोकले पछि पारे । राहुलले तेस्रो दिन बुधबार ६-अन्डर ६६ को उत्कृष्ट स्कोर निकाले ।

भारतीय गल्फ टुर खेलिरहेका प्रो सुभाषलाई एक स्ट्रोकले पछि पार्ने क्रममा राहुलले आज फ्रन्ट नाइनमा‌ बोगी रहित ५-अन्डर ३१ को उत्कृष्ट प्रदर्शन गरे । उनले पहिलो देखि तेस्रो तथा छैटौं र सातौं होलमा गरी कुल ५ बर्डीको सफलता प्राप्त गरे । यसपछि ११औं होलमा १ सट खेर फाल्दा १५औं र १८औं होलको बर्डीले ब्याक नाइन १-अन्डर ३५ मा सकाए । राहुलले पहिलो दिन ३-अन्डर र दोस्रो दिन ७-अन्डर खेलेका थिए ।

पहिलो दिनका संयुक्त लिडर सुभाषले आज ५-अन्डर ६७ को स्कोर बनाए । समग्रमा उनले १५-अन्डर २ सय १ स्कोर बनाएका छन् । उनले बोगी रहित स्कोर कार्ड तयार पारे । उनले फ्रन्ट नाइन ३-अन्डर ३३ र ब्याक नाइन २-अन्डर ३४ खेले । यो क्रममा उनले तेस्रो, चौथो, नवौं, बार्है र तेर्हौ होलमा कुल ५ बर्डीको सफलता प्राप्त गरे ।

एमेच्योर सदभाव आचार्यले आज ५-अन्डर ६७ को नतिजा निकाले । समग्रमा १३-अन्डर २ सय ३ स्कोरका साथ उनी तेस्रो स्थानमा छन् । सदभावले दोस्रो, तेस्रो, सातौं र नवौं होलको बर्डीले फ्रन्ट नाइन ४-अन्डर ३२ मा सकाए । यसपछि ११औं होलमा डबल बोगी खेपे । तर लगत्तै १२औं होलमा इगलको सफलता प्राप्त गरे भने १८औं होलमा एक सट बचाए । ब्याक नाइन १-अन्डर ३५ खेले ।

अब अन्तिम १८ होलको खेल‌ बाँकी रहँदा राहुल, सुभाष र सद्भावबीच उपाधिको लागि कडा प्रतिस्पर्धा हुने देखिएको छ । एमेच्योरद्वय सदभाव र राहुलले यो सिजन एक-एक उपाधि जितिसक्दा सुभाष भने उपाधि रक्षा गर्ने दाउमा हुनेछन् ।

समग्रमा ११-अन्डर २ सय ५ को स्कोरमा निरज तामाङ र भुवन नगरकोटी संयुक्तरुपमा चौथो स्थानमा रहे । निरजले ४-अन्डर ६८ मा खेल पुरा गरे । भुवनले आज दिनकै उत्कृष्ट ८-अन्डर ६४ को स्कोर दर्ता गरे । यो क्रममा उनले कुल नौ बर्डी प्रहार गरे। पाँचौं होलमा एक सट खेर फाले। पहिो, दोस्रो, चौथो र नवौङ होलमा बर्डी प्रहार गरे । यसपछि ११औं देखि १५ औं होलमा लगातार ५ बर्डीको सफलता प्राप्त गरे ।

भुटानका निम दोर्जी तामाङ समग्रमा ८-अन्डर २ सय ८ सहित छैटौं स्थानमा छन् । उनले आज २-अन्डर ७० खेले । उनी एमेच्योरतर्फ भने तेस्रो स्थानमा छन् । समग्रमा ७-अन्डर २ सय ९ सहित दिनेश प्रजापति सातौं स्थानमा रहने क्रममा आज ४-अन्डर ६८ को नतिजा निकाले ।

नेपाल प्रोफेसनल गल्फर्स एसोसिएसनद्वारा आयोजित चार दिने प्रतियोगितामा ३७ जना प्रोफेसनल गल्फरले हालसम्मकै सर्वाधिक १६ लाख नगद पुरस्कार राशीको लागि दाबेदारी प्रस्तुत गरिरहेका छन् । विजेताले उपाधि सहित ३ लाख नगद पुरस्कार प्राप्त गर्नेछन् । दोस्रो हुने खेलाडीले १ लाख ८५ हजार, तेस्रोले १ लाख २५ हजार, चौथोले १ लाख ५ हजार र पाँचौं हुनेले ९२ हजार रुपैयाँ हात पार्नेछन् । शीर्ष २१ भित्र रहने सबै खेलाडी नगद पुरस्कारको हकदार बन्नेछन् ।

चार दिने प्रतियोगितापछि असार ७ गते (शनिबार) प्रो-एम प्रतियोगिता हुनेछ । जहाँ २५ जना प्रोफेसनल र १०० जना कर्पोरेटस्तरका एमेच्योर खेलाडीले भाग लिनेछन् ।