काठमाडौं (हाम्रो खेलकुद) – नेपाली लिग च्याम्पियन टिप‌ टप हेल्प नेपाल स्पोर्टस क्लबले काभा मेन्स च्याम्पियन्स लिगको आफ्नो तेस्रो खेलमा पहिलो हार बेहोरेको छ।

माल्दिभ्समा जारी च्याम्पियन्स लिगमा आज दोस्रो खेलमा हेल्प नेपालले कीर्गिस्तानको क्लब बिस्केक कीर्गिस्तानसँग ३-२ ले पराजित भएको थियो।

दुई पटक खेलमा पछि परेर पनि खेलमा फर्केएको हेल्प नेपाल पाँचौं सेटमा गएर पराजित भएको थियो। विस्केक कीर्गिस्तान २५-२०,२६-२८,२५-२०,१७-२५ र १५-११ ले विजयी भएको थियो।

आफ्नो दोस्रो खेलमा शुक्रवार हेल्प नेपालले लगातार दोस्रो जित हात पारेको थियो । हेल्प नेपालले माल्दिभ्सको क्लब एचडिसीलाई ३-१ ले‌ हराएको हो । सुरुवाती दुई सेट जितेर खेलमा पकड बनाएको हेल्प नेपालले तेस्रो सेट गुमाएको थियो।

चौथो सेटमा लयमा‌ फर्कदै हेल्प नेपालले खेल जितेको थियो। पहिलो खेलमा हेल्प नेपालले बिहीवार घरेलु टोली धिवेही सिफाइन्स क्लबलाई ३-२ ले हराएको हो ।

सेन्ट्रल एसियन भलिबल एसोसियन (काभा) को आयोजना भइरहेको च्याम्पियन्स लिगमा काभाका सदस्य रहेका ५ देशका लिग च्याम्पियन क्लब र आयोजकको उपविजेता समेत गरि ६ टोलीको सहभागिता रहेको छ ।

प्रतियोगिता सिंगल राउण्ड रोबिनका आधारमा हुनेछ । च्याम्पियन्स लिगको विजेताले सन् २०२६ को एसियन क्लब च्याम्पियनसिप खेल्न पाउनेछ।