काठमाडौँ (हाम्रो खेलकुद) – नेपाल ओपन एमेच्योर गल्फ च्याम्पियनसिप अन्तर्गत मंगलबार पार-७२ गोकर्ण गल्फ क्लबमा भएको पहिलो दिनको खेलमा हृदेश कुमार सिंहले अग्रता लिएका छन्। १ अन्डर ७१को स्कोर बनाएका हृदेशले दोश्रो स्थानमा रहेका शिव कुमार माझी र टाशी दोङभन्दा १ स्ट्रोक कम खेलेका छन्।
टाशी छिरिङ १ ओभर ७३ जोड्दै चौथो स्थानमा छन् भने पाँचौ स्थानमा रहेका शुक्र बहादुर राई र वाङचेन धन्दुपको २ ओभर ७४को स्कोर रहेको छ। पृथ्वी मल्लले ३ ओभर ७५को स्कोर बनाएका छन् भने टंक बहादुर कार्की, तेन्जिङ छिरिङ र भुटानका सेन्द्रा दोर्जीले ४ ओभर ७६को स्कोर जोडे।
बंगलादेशका मोहम्मद शाह आलम र मोहम्मद सोमरात सिक्दार संगै सुन्दर राई ५ ओभर ७७मा खेलिरहेका छन्।
टिम इभेन्टमा भने नेपाल ‘बि’ को प्रतिनिधित्व गरिरहेका शिव कुमार माझी (७२) र शुक्र बहादुर राई (७४)को जोडी १४६ स्कोर लिएर शिर्ष स्थानमा रहेको छ। टंक बहादुर कार्की(७६) र तेन्जीङ छिरिङ(७६) को जोडी रहेको नेपाल ‘ए’ १५२ अंकसंगै दोश्रो स्थानमा छ।
तेश्रो स्थानमा १५४ अंक जोडेको बंगलादेश [मोहम्मद शाह आलम (७७) र मोहम्मद शोमरात सिक्दर (७७)], चौथोमा १८६ अंक जोडेको भुटान ‘ए’ र पाँचौमा १८७ अंकसहित भुटान ‘बि’ रहेको छ।
