काठमाडौं (हाम्रो खेलकुद) – नेपाली पुरुष राष्ट्रिय भलिबल टोलीलाई प्रशिक्षण दिन नेदरल्यान्ड्सका भलिबल प्रशिक्षक म्याट भान विजल नेपाल आइपुगेका छन् । आज विहान त्रिभुवन विमानस्थलमा उनलाई नेपाल भलिबल संघका महासचिव जितेन्द्रबहादुर चन्द लगायतले स्वागत गरेका छन् ।
झन्डै एक महिनाको नेपाल बसाईका क्रममा विजलले पुरुष राष्ट्रिय टोली तथा पाँच स्कुलका भलिबल खेलाडीहरु प्रशिक्षण दिने संघले जनाएको छ । विजलको प्रशिक्षणपछि नेपालले अर्को महिना बंगलादेशसँग घरेलु कोर्टमा दुईवटा मैत्रीपूर्ण खेल खेल्ने यसअघि नै तय भइसकेको छ ।
नेपाल र बंगलादेशबीच भदौ पहिलो साता मैत्रीपूर्ण खेल हुनेछ । प्रशिक्षक विजल अन्तर्राष्ट्रिय भलिबल महासंघ (एफआइभिबी) को सहयोगमा नेपाल आएका हुन्् । उनीसँगै एफआइभिबीका विकास सदस्य तथा नेदरल्यान्ड्सका भलिबल संघका विकास व्यवस्थापक पिटर भान तरेल पनि नेपाल आएका छन् ।
वजलको भ्रमणको व्यवस्थापन नेदरल्यान्ड्स भलिबल संघले गरेको हो भने उनको पारिश्रमिक एफआइभिबीले बेहोर्नेछ । उनको नेपाल बसाईको आन्तरिक व्यवस्थापन भने नेपाल भलिबल संघले गर्ने बताइएको छ । संघले आजै साझ प्रशिक्षक र नेदरल्यान्ड्सका भलिबल संघका विकास व्यवस्थापकको स्वागतमा कार्यक्रम राखेको छ ।
