काठमाडौं (हाम्रो खेलकुद) – नेपाली भलिबलको इतिहासमा पहिलोपटक उमेर समूहको महिला तथा पुरुष राष्ट्रिय भलिबल प्रतियोगिता हुने भएको छ । नेपाल भलिबल संघ अन्र्तगतको नेपाल विद्यालय भलिबल कमिसनको आयोजनामा आगमी कात्तिकमा पहिलोपटक उमेर समूहको यु–१८ महिला तथा तथा पुरुष राष्ट्रिय प्रतियोगिता हुने भएको हो । प्रतियोगिता आगमी कात्तिक १२ गतेदेखि १८ गतेसम्म काठमाडौंमा हुनेछ ।

पहिलोपटक हुन लागेको उमेर समूहको दुवै विजेता टिमले समान १ लाख रुपैया प्राप्त गर्नेछ । यस्तै उपविजेताले ६० हजार र तेस्रो हुने टिमले ३५ हजार रुपैया प्राप्त गर्नेछ । यस्तै प्रतियोगितामा उत्कृष्ट हुने महिला र पुरुष खेलाडीले समान ५ हजार पाउनेछ । व्यक्तिगत विधा स्पाइकर, सेटर, ब्लकर, सर्भ र डिफेन्सले समान तीन–तीन हजार प्राप्त गर्नेछ ।

भलिबल संघले नै अहिलेसम्म गर्न नसकेको उमेर समूहको प्रतियोगिता गर्न विद्यालय कमिसन सक्षम छ त ? भन्ने जिज्ञासामा विद्यालय कमिसनका अध्यक्ष राम बहादुर केसीले विद्यालय कमिसनसँग प्याब्सन र एन प्याब्सनमा आबद्ध निजी विद्यालय चलाएका व्यक्तिहरुको साथले प्रतियोगिता गर्न कुनै समस्या नहुने बताए ।

‘हामीले उमेर समूहको प्रतियोगिता गराउने सोच विद्यालय कमिसन गठन भएदेखि नै सोच बनाएका थियौं ।’ अध्यक्ष केसीले भने, ‘करिब सात महिनाको गृहकार्य पछि हामी उमेर समूहको प्रतियोगिता गराउने निर्णयमा पुगेका छौं । यो नै नेपाली भलिबलको विकासमा टेवा पुग्न सक्छ ।’

नेपाल विद्यालय भलिबल कमिसनले आफ्नो बार्षिक कार्यक्रम सार्वजनिक गर्दै पहिलो पटक उमेर समूहको प्रतियोगिता गर्न लागेको जानकारी गराए । विद्यालय कमिसनको वार्षिक कार्यक्रम अनुसार आगमी भदौं १० गते भलिबल महोत्सब, कात्र्तिकमा यु–१८ महिला पुरुष भलिबल प्रतियोगिता, मंसिरमा वार्षिक साधरण सभा र चैतमा अन्तर विद्यालय स्तरीय यु–१६ छात्र/छात्रा भलिबल प्रतियोगिता रहेको छ ।

यस्तै नेपाल भलिबल संघको समन्वयमा यु–१९ बिच भलिबल प्रतियोगिता, यु–१६ र यु–१८ को अन्तर्राष्ट्रिय तथा मैत्रीपूर्ण भलिब प्रतियोगिता, यु–१६ र यु–१८ को महिला तथा पुरुष राष्ट्रिय टिमको तयारी र टिमलाई होस्टलसहित प्रशिक्षणको व्यवस्था वार्षिक क्यालेन्डरमा उल्लेख छ । यस्तै विद्यालय भलिबल कमिसनको संगठन विस्तार र नेपाल भलिबल संघले आयोजना गर्ने सबै प्रतियोगिताहरुमा सहयो गर्ने पनि विद्यालय कमिसनले वार्षिक क्यालेन्डरमा उल्लेख छ ।

वार्षिक क्यालेन्डर सार्वजनिक गरेकै अवसरमा नेपाल विद्यालय भलिबल कमिसनले माल्दिभ्समा गत मार्चमा सम्पन्न तेस्रो एभसी सेन्ट्रल जोन सिनियर पुरुष भलिबल च्याम्पियनसिपमा तेस्रो स्थान हात पार्न सफल खेलाडी तथा प्रशिक्षकलाई सम्मानित गरेको छ । कमिसनले १२ सदस्यीय टोलीलाई एकमुष्ट रुपमा ४५ हजार नगदसहित प्रमाणपत्रले सम्मानित गरेको हो । यस्तै कमिसनले १३ सदस्यीय काठमाडौं जिल्ला कमिसनको समेत घोषणा गरेको छ ।