काठमाडौं– राष्ट्रिय खेलकुद परिषद् (राखेप) ले दक्षिण एसियाली खेलकुद (साफ अहिलेको साग) का स्वर्ण पदक विजेता खेलाडीलाई पुनःमासिक रुपमा भत्ता स्वरुप २ हजार ५ सय उपलब्ध गराउन सुरु गरेको छ ।
सन् १९८४ मा काठमाडौंबाट सुरु भएको साग पछिल्लो पटक २०१० मा बंगलादेशमा भएको थियो । पछिल्ला ११ औं संस्करणमा समूहगत र एकल गरि १ सय ३ खेलाडीले स्वर्ण पदक जितेका छन् ।
स्वर्ण विजेता खेलाडीले नियमित रुपमा मासिक भत्ता पाउने जनाउँदै राखेप सदस्य सदस्य सचिव केशवकुमार विष्टले भने ‘हामीले यसको निरन्तरताका लागि अर्को बर्षबाट बजेटमा समेट्ने प्रयास गरिरहेका छौं ।’
खेलाडीलाई भत्ता दिन सुरु गरेको यो पहिलो पटक होइन । जीवनराम श्रेष्ठ २०५३÷०५४ सालमा पहिलो पटक राखेपको सदस्य सचिव हुँदा सागका स्वर्ण पदक विजेता र एसियाली खेलकुदको पदक विजेता खेलाडीलाई मासिक १ हजार पाँच सय रुपैयाँ दिने परम्परा सुरु भएपनि पछि रोकिएको थियो । ओलम्पियनलाई दिदै आएको भत्ता पनि राखेपले पछि कट्टा गरेको थियो ।
