काठमाडौं (हाम्रो खेलकुद) – नेपाल नम्बर १ गल्फर शिवराम श्रेष्ठ सूर्य नेपाल गल्फ टुर २०१८/१९ अन्तर्गत पहिलो प्रतियोगिता सूर्य नेपाल सेन्ट्रल ओपनको उपाधिनजिक पुगेका छन् । प्रतियोगिताको तेस्रो दिन लय कायम राख्दै कुल १० स्ट्रोकको अग्रता बनाएपछि उनी सिजनको सुखद सुरुवात नजिक पुगे ।

गोकर्ण गल्फ क्लबमा तेस्रो दिन बुधबार शिवरामले ३ अन्डर ६९ को स्कोर जोड्दै शीर्ष स्थानमा पकड कायम राखे । उनले समग्रमा १२ अन्डर २ सय ४ को स्कोर बनाएका छन् । दोस्रो स्थानमा रहेका भुवनले घरेलु कोर्समा इभन पार ७२ जोडे । उनी समग्रमा २ अन्डर २ सय १४ मा खेलिरहेका छन् । तेस्रो स्थानमा एमेच्योर टासी छिरिङ छन् । उनले बुधबार २ ओभर ७४ खेलेपनि समग्रमा इभन पार २ सय १६ सहित एमेच्योरतर्फ ५ स्ट्रोकको अग्रता लिएका छन् । उनका सहोदर भाइ वाङचेन धोन्दुप एमेच्योरतर्फ दोस्रोमा छन् ।

धनबहादुर थापाले खराब प्रदर्शन गदै ३ ओभर ७५ जोडेपछि  २ ओभर २ सय १८ स्कोरका साथ चौह्तो स्थानमा छन् । बुधबार प्रतियोगिताकै उत्कृष्ट स्कोर बनाउने क्रममा एमेच्योर विनोद तामाङले ६ अन्डर ६६ स्कोर जोडे । उनी ८ ओभर २ सय २४ अंक जोड्दै रवी खड्कासँग छैटौं स्थानमा छन् । आठौँ स्थानमा चुडाबहादुर भण्डारी र एमेच्योर सुनील केसीले ८ ओभर २ सय २४ तथा दशौँ स्थानका रामकृष्ण श्रेष्ठ र रामे मगरले १० ओभर २ सय २६ जोडेका छन् ।

प्रतियोगितामा ३० व्यवसायिक र ११ एमेच्योरगरि कुल ४१ गल्फरहरुले प्रतिस्पर्धा गरेका थिए । तेस्रो दिनदेखि २१ व्यवसायिक र ८ एमेच्योर गल्फरले कट बनाए । प्रतियोगितामा विजेताले १ लाख २० हजार रुपैयाँ प्राप्त गर्नेछन् । उपविजेताले ७७ हजार, तेस्रो स्थान हासिल गर्नेले ५५ हजार तथा २१ औं स्थान सम्मका व्यावसायिक गल्फरले नगद पुरस्कार पाउनेछन् । यस प्रतियोगिताको कुल पुरस्कार राशी ६ लाख ६१ हजार ५ सय रुपैयाँ छ ।