काठमाडौं (हाम्रो खेलकुद) – १२ औं दक्षिण एसियाली खेलकुद (साग) मा कास्य पदक जितेको पाँच महिनापछि नेपाल भलिबल संघले महिला भलिबल टोलीलाई शुक्रबार सम्मान गरेको छ ।  नेपाल भलिबल संघले ओलम्पिक डे को अवसर पारेर राजधानीमा पदक विजेता टोलीका खेलाडीलाई नगदसहित सम्मान गरेको हो । सघंले प्रत्येक खेलाडी तथा अफिसियललाई जनही १० हजार रुपैयाँ दिएको थियो ।

सम्मानपछि महिला भलिबल टोलीका खेलाडी, संघका पदाधिकारी र अन्य अतिथी ।

राष्ट्रिय खेलकुद परिषद (राखेप) का उपाध्यक्ष एवं नेपाल ओलम्पिक कमिटि (एनआसी) का महासचिव लामा टेण्डी शेर्पा, नेपाल भलिबल संघका अध्यक्ष मनोरञ्जन शर्मा लगायतले सम्मान गरेका थिए । फागुनमा भारतमा सम्पन्न १२ सागमा नेपाली टोलीको कप्तान विनिता बुढाथोकी र उपकप्तान मन्जु गुरूङ थिइन् । अन्य खेलाडीमा नेविका चौधरी, सरस्वती चौधरी, अरुणा शाही, प्रतिभा माली, मनिषा चौधरी, कमला पुन, कोपिला उप्रती, रेश्मा भण्डारी, कृपा अधिकारी र उषा विष्ट थिए । सम्मान अवसरमा राखेपद्धारा नेपाल भलिबल संघको सदस्यमा मनोनित भएकी रिता कोइरालालाई प्रमाण पत्र प्रदान गरियो ।
कार्यक्रममा भलिबल संघका उपाध्यक्ष यामबहादुर गुरुङ, निरोज मास्के, महासचिव जितेन्द्रबहादुर चन्द, सचिव जगदिश भट्ट, मनवीर छन्त्याललगायतको उपस्थिति थियो । १२ औं सागका पदक विजेता खेलाडीलाई सरकारले अहिले सम्म नगद पुरस्कार दिएको छैन ।