काठमाडौं (हाम्रो खेलकुद) – विभागीय टोली नेपाल एपीएफ क्लबलाई सोझो सेटमा पराजित गर्दै हेल्प नेपाल स्पोर्ट्स क्लबले आरबीबी एनभीए राष्ट्रिय महिला तथा पुरुष भलिबल क्लब च्याम्पियनसिपको पुरुषर्फको उपाधि जितेको छ ।

दशरथ रंगशालाको कभर्ड हलमा शुक्रबार भएको फाइनलमा हेल्प नेपालले एपीएफमाथि २५-१७, २५-१४, २५-२१ को सहज जित दर्ता गर्यो । तीन भारतीय खेलाडीसहित उत्रिएको हेल्प नेपालले खेल अवधिभर नै एपीएफलाई दवावमा राखेको थियो । एक समय दोस्रो सेटमा हेल्प नेपाल ९-० को अग्रता लिन सफल भएको थियो । उपाधिसँगै हेल्प नेपालले २ लाख रुपैयाँ प्राप्त गर्नेछ ।

दशरथ रंगशालास्थित कभर्ड हलमा शुक्रबार भएको फाइनलमा होंगान्जी न्यु डायमण्ड स्पोर्ट्स क्लबलाई ३-१ ले पराजित गर्दै एपीएफ च्याम्पियन बनेको हो । निकै प्रतिस्पर्धात्मक फाइनल खेलमा एपीएफले पहिलो सेट २५-२३ ले जितेको थियो । अधिकांश समय न्यु डायमण्डले अग्रता लिएपनि एपीएफ विजयी रहयो । दोस्रो सेटमा पनि न्यु डायमण्डले अन्तिम समयमा लय गुमाउन पुग्दा सेट २५-२१ ले सुम्पियो ।

तेस्रो सेटमा स्कोर २२-२० को अवस्थामा रहँदा प्रतिभा माली स्पाइक प्रहार गरेपछि लड्न पुग्दा खेल रोकिएको थियो । गम्भीर चोट बोकेपछि प्रतिभालाई हस्पिटल लागिएको थियो । उक्त सेट न्यु डायमण्डले २५-२३ ले जित्यो । चौथो सेटमा एपीएफ २५-१८ ले विजयी हुँदै उपाधि रक्षा गर्न सफल रहयो ।

त्यसअघि प्रतियोगिताको तेस्रो स्थानको खेलमा आर्मीको दुवै टोलीले पुलिसलाई सोझो सेटमा पराजित गरे । पुरुष तर्फ आर्मीले २५-१८, २५-१८, २५-२० को अन्तरमा जित दर्ता गर्दै ५० हजार रुपैयाँ हात पार्यो । महिलातर्फ पनि आर्मी २५-२२, २५-१३, २५-२१ ले विजयी रहयो ।

यसअघि बिहीबार भएको सेमिफाइनलमा दुवै विभागीय टोली पराजित भएका थिए । महिला र पुरुष दुवैतर्फ फाइनल खेल आज हुनेछ । पुरुषतर्फ नेपाल एपीएफ क्लब र हेल्प नेपाल स्पोर्ट्स क्लब उपाधिका लागि खेल्नेछन् । महिलामा एपीएफले होंगान्जी न्यु डायमण्डसंग खेल्नेछ ।

नेपाल भलिबल संघ (एनभिए) को आयोजना तथा राष्ट्रिय वाणिज्य बैंक (आरबिबी) को मुख्य प्रायोजनमा जारी प्रतियोगिताको यो पाँचौं संस्करण हो । प्रतियोगिताका दुवैतर्फका विजेताले २ लाख, दोस्रो हुने टोलीले १ लाख र तेस्रो टोलीले ५० हजार रुपैयाँ प्राप्त गर्नेछ । त्यस्तै दुवैतर्फका सर्वोत्कृष्ट खेलाडीले समान २५ हजार पाउनेछन् । विधागत उत्कृष्टले समान १० हजार रुपैयाँ पाउनेछन् ।