१२ औं दक्षिण एसियाली खेलकुद सम्पन्न भएको झन्डै ६ महिना पछि सरकारले पदक विजेता खेलाडीलाई आज सम्मान गरेको छ । बालुवाटारस्थित निवासमा आयोजित कार्यक्रममा प्रधानमन्त्री केपी ओलीले विजेता खेलाडी, प्रशिक्षक, सहायक प्रशिक्षक र पदक जितेका राष्ट्रिय संघलाई गरि झन्डै ४ करोड रुपैयाँ वितरण गरे ।

भारतको सिलोङ र गुहाटीमा फागुनको पहिलो साता सम्पन्न १२ औं सागमा सागमा नेपालले व्यक्तिगत र समूहगततर्फ गरि ३ स्वर्ण, २३ रजत र ३४ कास्य पदक जितेको थियो । राष्ट्रिय खेलकुद परिषदको कार्यविधि अनुसार सागमा व्यक्तिगततर्फ स्वर्ण जित्नेलाई ५ लाख रजतलाई ३ र कास्य जित्नेलाई २ लाख दिइनेछ । त्यस्तै टिममा स्वर्ण जित्ने टोलीका सदस्यलाई २ लाख, रजतलाई १ लाख ५० हजार र कास्य जित्नेलाई १ लाख रुपैयाँ दिने प्रावधान छ ।

स्वर्ण जिताउने प्रशिक्षकलाई ३ लाख सहायक प्रशिक्षकलाई १ लाख ५० हजार, रजत दिलाउने प्रशिक्षकलाई २ लाख र सहयाक प्रशिक्षकलाई १ लाख तथा कास्य दिलाउने प्रशिक्षकलाई १ लाख र सहायकलाई ५० हजार दिने कार्यविधिमा उल्लेख छ । त्यस्तै स्वर्ण जित्ने संघलाई ५ लाख, रजतलाई ३ लाख र कास्यलाई २ लाखबाट सम्मानित गरिएको छ ।

खेलाडीलाई बिहान ८ बजे बालुवाटार पुग्न खबर गरिएपनि प्रधानमन्त्री ओली भने झन्डै २ घण्टा ढिला कार्यक्रम स्थल पुगेका थिए । खेलाडीलाई सम्मानपछि उनले आफु पदमा रहदा वा नरहदा खेलाडीकै पक्षमा रहने बताएका थिए । सागमा २३ बर्षपछि स्वर्ण पदक जितेको नेपाली टोलीलाई राखेपको कार्यविधिमा भएभन्दा बढी जनही ५ लाख दिने घोषणा गरिएको थियो । तर, कार्यक्रममा भने अहिले अन्य टोलीलाई जस्तै जनही २ लाख रुपैयाँ वितरण गरियो । राखेप सदस्य सचिव केशवकुमार विष्टले थप ३ लाख मन्त्रीपरिषद्बाट निर्णय गराएर दिने जानकारी दिए ।