काठमाडौं (हाम्रो खेलकुद) – मनाङ मस्याङ्दी क्लब र संकटा क्लबले काठमाडौमा जारी कतार एअरवेज सहिद स्मारक ए डिभिजन लिगअन्तर्गत तेस्रो चरणको खेलको पहिलो हाफमा १–१ को बराबरी खेलेका छन् । खेलमा पछि परेको अवस्थाबाट मनाङले बराबरी गोल फर्काएको हो ।
निरज बस्नेतको गोलबाट संकटाले ३१ औं मिनेटमा खेलमा अग्रता बनाएको थियो । लक्ष्मण रुचालको फ्रिकिकमा निरजले हेडरमार्फत बललाई पोष्टको दिशा दिएका थिए । तर,त्यो अग्रता लामो समय टिकेन । ३५ औं मिनेटमा मनाङका लागि दयानन्द सिंहले बराबरी गोल फर्काएका थिए ।पुजन उपरकोटीको फ्रिकिकलाई अफिज ओलावालेले हेड गर्दै मिलाएपछि नजिकबाट दयानन्दले हेडरमार्फत गोल गरेका थिए ।
दशरथ रगंशालामा शनिबार भएको खेलको २४ औं मिनेटमा दीनेश राजवंशीको फ्रिकिक पोष्ट माथिबाट बाहिरिदाँ मनाङ अग्रता लिनबाट चुेकेको थियो । २६ औँ मिनेटमा दयानन्दको क्रसमा अफिज ओलावालेको प्रहार संकटाका डिफेन्डरले क्लियर गरिदिए ।
३० औं मिनेटमा संकटाका गोलकिपर राजाबाबु थापा विट भइसकेको अवस्थामा मनाङ कप्तान अन्जन विष्टको प्रहारलाई डिफेन्डर निरज बस्नेतले गोललाइनबाट क्लियर गरेका थिए । ३८ औँ मिनेटमा मनाङका पुजनको फ्रिकिक प्रहार किपरले पन्च गर्दै बचाए।
मनाङ संकटालाई पराजित गर्दै लिगमा लगातार तेस्रो जित निकाल्दै शीर्षस्थानमा उक्लने योजनामा छ । मनाङले सुरुवाती दुई खेलमा जावलाखेल युथ क्लब र हिमालयन शेर्पालाई समान १-० ले हराएको थियो । संकटा पनि मनाङको अपराजित यात्रामा पुर्णविराम लगाउँदै दोस्रो जितको खोजीमा छ । लिगको पहिलो खेलमा हिमालयन शेर्पासँग अंक बाँडेको संकटाले दोस्रो खेलमा फ्रेन्ड्समाथि २–१ को पूनरागमन जित निकालेको थियो।
