एजेन्सी – अमेरिकी फरवार्ड जोसुआ (जोश) सारगेन्टको दुई गोल मद्दतमा नर्विच सिटीले इंग्लिस प्रिमियर लिगमा महत्वपूर्ण जित निकाल्दा वाट्फोर्डलाई पराजित गरेको छ । नर्विचले घरेलु टोली वाट्फोर्डलाई ३–० ले पराजित गर्दै तत्कालका लागि रेलिगेसन जोन छाडेको हो ।

भिकारेज रोड वाट्फोर्डमा १० खेलाडीमा समेटिएको घरेलु टोली वाट्फोर्डलाई हराउन नर्विचका जोसुआ सारगेन्टले दुई गोल गर्दा एक गोल उपहार पाएको थियो । सबै तीन गोल दोस्रो हाफमा नै भएको थियो ।

खेलको ५१औं मिनेटमा जोसुआ सारगेन्टले गोल गर्दै नर्विचलाई १–० को अग्रता दिलाए । उनले टिमु पुक्कीको पासलाई सदुपयोग गरेका थिए । ७४औं मिनेटमा जोसुआले मिलोट रासिकाको पासमा व्यक्तिगत र टोलीको लागि दोस्रो गोल गर्दै टोलीको अग्रता दोब्बर पारे ।

७८औं मिनेटमा घरेलु टोली १० खेलाडीमा समेटिन पुग्दा वाट्फोर्डको खेलमा फर्कने सम्भावना टाढिएको थियो । इमानुएल डेनिस दोहोरो पहेलो कार्ड खाँदै मैदानबाट बाहिरिएका थिए । इन्ज्युरी समयको थप गरिएको दोस्रो मिनेटमा जुराज कुकाले आत्मघाती गोल गरेपछि नर्विचले सहज जित निकाल्न सफल भयो ।

यो जितसँगै नर्विचले तत्कालका लागि रेलिगेसन जोन छाडेको छ । टोलीको २२ खेलबाट १६ अंक छ । नर्विचले भन्दा ५ खेल कम खेलेको बर्नले ११ अंक जोडेर पुछारमा छ । दुई खेल कम खेलेको वाट्फोर्डको १४ र न्यूक्यासलको १२ अंक छ ।