पोखरा (हाम्रो खेलकुद) – नाइजेरियन फरवार्ड ओलावाले आफिजको प्रभावशाली प्रदर्शनमा मनाङ मर्स्याङ्दी क्लबले २० औं आहा रारा गोल्डकप फुटबल प्रतियोगिता २०७८ को सेमिफाइनलमा स्थान पक्का गरेको छ ।

पोखरा रंगशालामा आइतबार भएको क्वाटरफाइनलमा मनाङले नेपाल पुलिस क्लबलाई २-० ले पराजित गर्दै अन्तिम चारमा स्थान पक्का गरेको हो । मनाङको जितमा आफिजले १ गोल र १ असिस्टको योगदान दिए । राष्ट्रिय टोलीमा ४ खेलाडी रहेका कारण मनाङले न्यु रोड टिम (एनआरटी) का शिव गुरुङ र राजेश परियारलाई पहिलो रोजाइमा खेलाएको थियो ।

पहिलो हाफ गोलरहित रहेको खेलमा मनाङले दुवै गोल दोस्रो हाफमा गरेको थियो । ६४औं मिनेटमा रुपेश केसीले गोल गर्दै मनाङलाई सुरुवाती अग्रता दिलाए । हेमन्त श्रेष्ठको ब्याक पासलाई अजित भण्डारीले पेनाल्टी बक्समा गम्भीर गल्ती गर्दा मनाङले त्यसको फाइदा उठायो । अजितले क्लियर गर्न नसकेको बलमा आफिजले दिएको क्रसलाई रुपेश केसीले तीन डिफेन्डर र गोलरक्षकबीचबाट सुन्दर गोल गर्न सफल भएका थिए ।

८४औं मिनेटमा कप्तान जुमानु राईले सुवर्ण अवसर खेर फाल्दा पुलिस बराबरीबाट चुक्यो । लगत्तै काउन्टर अट्याकमा ओलावाले अफिजको पासमा अशोक थापा मगरको शक्तिशाली प्रहारलाई गोलरक्षक सन्जित श्रेष्ठले बचाए । रिवाउन्डमा अशोककै हेड पासमा राजेश परियारको प्रहार अकासियो ।

८८औं मिनेटमा ओलावाले अफिजले गोल गर्दै मनाङको जित पक्का गरे । भोला सिलवालबाट बल खोस्दै मैदानको मध्यभागबाट एक्लै बल अघि बढाँउदै अजित र भोलालाई नै बिट गर्दै गोलरक्षक अघि बढेको अवस्थामा उनको प्रहारले जाली चुमेको थियो । लगत्तै ओलावालेको प्रहारलाई गोलरक्षक सन्जितले बचाए ।

मनाङले अब सेमिफाइनलमा मंगलबार हुने त्रिभुवन आर्मी फुटबल क्लब र थ्री स्टार क्लबको विजेतासँग खेल्नेछ । सोमबार प्रतियोगिताको तेस्रो क्वाटरफाइनलमा साविक विजेता संकटा र ए डिभिजन लिगको शीर्ष टोली मछिन्द्रबीच प्रतिस्पर्धा हुनेछ । यसअघि शनिबार पहिलो क्वाटरफाइनलमा एपिएफले अमेरिकी टोली भुटनीज युथ स्पोर्ट्स क्लब (बिवाइएससी) लाई ३-१ ले पराजित गरेको थियो ।

प्रतियोगितामा ए डिभिजनका ८ सहित १० टोलीले सहभागिता जनाएका छन् । आहा गोल्डकपको विजेताले उपाधिसहित १० लाख १ हजार रुपैयाँ र दोस्रो हुनेले टोलीले ५ लाख १ हजार रुपैयाँ प्राप्त गर्नेछ । प्रतियोगितामा १ करोड ६ लाख ४८ हजार ५ सय रुपैयाँ खर्च हुने अनुमान गरिएको छ ।

पहिलो वर्ष क्याराभान गोल्ड कपसहित २१ वर्षदेखि निरन्तर सञ्चालन भएको यस प्रतियोगितामा बचत हुन आएको रकम क्लबद्वारा संचालित सुर्य बहादुर केसी स्मृति सहारा फुटबल एकेडेमीमा खर्च गरिनेछ । एकेडेमीमा हाल तेस्रो ब्याचमा १४ जिल्लाका २४ जना बालकहरु आश्रित छन् । २०७० साल देखि उनीहरु आवसिय रुपमा निशुल्क स्वास्थ्य, शिक्षा दिक्षा लगायत फुटबल प्रशिक्षण समेत सहारा फुटबल एकेडेमी गण्डकी प्रदेश, पोखरा–१७ स्थित दोविल्लामा प्रदान गर्दै आईरहेका छ ।

आहा रारा गोल्डकपको खेल तालिका तथा नतिजाको लागि यहाँ थिच्नुहोस