एजेन्सी – १० खेलाडीमा समेटिएको कोमोरसमाथि संघर्षपुर्ण जित निकाल्दै आयोजक क्यामरुनसँगै गाम्विया अफ्रिका कप अफ नेसन्सको क्वाटरफाइनलमा प्रवेश गरेका छन् ।

क्यामरुनले कोमोरसलाई २–१ ले पराजित गर्दै अन्तिम आठमा स्थान सुरक्षित गरेको हो । क्यामरुनमा सोमबार राति भएको खेलमा घरेलु टोलीको जितमा कार्ल टोको इकाम्वी र भिनसेन्ट एवाउवकारले गोल गरे । कोमोरसका यौसोउफ एमचाङएमाले एक गोल फर्काए ।

ओम्निस्पोर्ट्स पउल विया याओउन्डी क्यामरुनमा भएको खेलको सातौ मिनेटमा नै कोमोरस १० खेलाडीमा समेटिन पुगेको थियो । नाद्जिम एब्डोउ सिधै रातो कार्ड खाँदै मैदानबाट बाहिरिएका थिए । त्यसको फाइदा घरेलु टोलीले उठाउन सफल भयो ।

२९औं मिनेटमा कार्ल टोको इकाम्वीले गोल गर्दै क्यामरुनलाई १–० को अग्रता दिलाए । उनले भिनसेन्ट एवाउवकारको पासमा गोल गर्न सफल भएका थिए । ७०औं मिनेटमा भिनसेन्ट एवाउवकारले मार्टिन होङ्लाको पासमा गोल गर्दै क्यामरुनको अग्रता दोब्बर पारे ।

८१औं मिनेटमा यौसोउफ एमचाङएमाले गोल गर्दै खेललाई २–१ को अवस्थामा ल्याएपनि त्यसपछि थप गोल निस्कन नसक्दा क्यामरुन विजयी हुन सफल भयो ।

अर्काे प्रि–क्वाटरफाइनल खेलमा गाम्वियाले गिनियालाई १–० ले पराजित गर्दै क्वाटरफाइनलमा स्थान पक्का गरेको छ । गाम्वियाको जितमा ७१औं मिनेटमा मुसा बारोले गरेको गोल नै निर्णायक बन्यो । दुवै टोलीले १० खेलाडीमा समेटिएर खेलको अन्त्य गरेको थियो ।

८७औं मिनेटमा गाम्वियाका युसुफा एनजे दोहोरो पहेलो कार्डसहित मैदानबाट बाहिरिदा गिनियाका इब्राहिमा कोन्टे इन्ज्युरी समयको थप गरिएको तेस्रो मिनेटमा दोहोरो पहेलोकार्डसहित मैदानबाट बाहिरिएका थिए ।

अब क्यामरुन र गाम्वियाबीच नै क्वाटरफाइनल खेल हुनेछ । अर्काे क्वाटरफाइनलमा बुर्किना फासो र ट्युनिसियाले खेल्नेछ । क्वाटरफाइनल पुग्न अब चार टोलीको टुंगो लाग्न बाँकी छ ।