पोखरा (हाम्रो खेलकुद) – ए डिभिजन लिग च्याम्पियन मछिन्द्र फुटबल क्लबलाई स्तब्ध पार्दै विभागीय नेपाल एपिएफ फुटबल क्लब २०औं आहा रारा गोल्डकप २०७८ को फाइनलमा प्रवेश गरेको छ ।

एपिएफले १० खेलाडीमा समेटिएको मछिन्द्रलाई ३–१ ले स्तब्ध पार्दै इतिहासमा दोस्रो पटक आहा राराको फाइनलमा पुग्न सफल भएको थियो । यसअघि एपिएफ २०६४ मा फाइनलमा प्रवेश गरेको थियो । पोखरा रंगशालामा बुधबार एपिएफको जितमा सनिश श्रेष्ठ, प्रदीप लामा र नविन लामाले गोल गरे । मछिन्द्रका ओमोलाजा नुरेन करिमको बराबरी गोल खेलको नतिजा बदल्न पर्याप्त रहेन ।

सुरुवातदेखि नै प्रतिस्पर्धात्मक बनेको खेलको छैटौं मिनेटमा विकी तामाङको क्रसमा अर्मान्ड विडोमले पेनाल्टी बक्समा टर्न गर्दै गरेको सशक्त प्रहार पोस्ट नजिकैबाट बाहिरिदा एपिएफ अग्रता लिनबाट चुक्यो । १४औं मिनेटमा मेसुके ओलुमोउको प्रहारलाई एपिएफका गोलरक्षक युया कुरियामाले सहजै नियन्त्रणमा लिए ।

१९औं मिनेटमा अर्मान्डको क्रसमा कप्तान नविन लामालाई लागेको बलमा प्रदीप लामाले गरेको प्रहारलाई गोलरक्षक सुर्य अधिकारीले मुस्किलले नियन्त्रणमा लिए । २४औं मिनेटमा अर्मान्डको प्रहारलाई गोलरक्षक सुर्यले सहजै बचाए ।

२५औं मिनेटमा सनिस श्रेष्ठले गोल गर्दै एपिएफलाई सुरुवाती अग्रता दिलाए । छिरिङ गुरुङले मणि लामालाई फउल गरेपछि मणि लामाले झन्डै ३० यार्ड टाढाको फ्रिकिकमा सनिसले उत्कृष्ट जम्प गर्दै हेडमार्फन सुन्दर गोल गर्न सफल भएका थिए । २८औं मिनेटमा ओमोलाजा नुरेन करिमको फ्रिकिकलाई युया कुरियामाले पञ्च गर्दै बचाउँदा मछिन्द्र बराबरीबाट चुक्यो ।

३२औं मिनेटमा छिरिङको पासमा अभिषेक रिजालको हेडर सदुपयोग हुन सकेन । ४०औं मिनेटमा ओमोलाजा नुरेन करिमले गोल गर्दै खेललाई १–१ गोलको बराबरीमा ल्याए । सविन थापाले मेसुके ओलुमोउलाई फउल गरेपछि झन्डै ३० यार्डबार्ट कप्तान रेजिन धिमालको फ्रिकिकलाई अनमार्क रहेका करिमले हेडमार्फत सुन्दर गोल गर्न सफल हुदा गोलरक्षक युया कुरियामाले रोक्ने कुनै मौका नै पाएन ।

६४औं मिनेटमा रेजिन धिमालको कर्नरलाई युया कुरियामाले पञ्च गर्दै बचाउँदा मछिन्द्र अग्रता लिनबाट चुक्यो । ६८औं मिनेटमा प्रदीप लामाले गोल गर्दै एपिएफलाई २–१ को अग्रता दिलाए । कप्तान नविन लामाको क्रसमा गोलक्षक र डिफेन्डरबीच तालमेल मिल्न नसक्दा गोलरक्षक अघि बढेको अवस्थामा प्रदीपले गोल गर्न सफल भएका थिए ।

७१औं मिनेटमा मछिन्द्र १० खेलाडीमा समेटिन पुग्यो । गोलकर्ता ओमोलाजा नुरेन करिनले रेफ्रीसँग विवाद गर्न थालेपछि रेफ्री नविन्द्र महर्जनले दोहोरो पहेलो कार्ड देखाउँदै मैदान बाहिर पठाए । ७४औं मिनेटमा नविन लामाकै क्रसलाई छिरिङले हेड गर्दै मछिन्द्रको संकट टारे । ७६औं मिनेटमा अर्मान्डले वान भर्सेस वानको अवस्थामा मौका पाएपनि लड्न पुगे ।

खेलको ९० औं मिनेटमा अर्मान्डको हेडर पोस्टभन्दा माथि जाँदा एपिएफ अग्रता बढाउनबाट बन्चित भएको थियो । इन्ज्युरी समयको सातौं मिनेटमा कप्तान नविन लामाले गोल गर्दै एपिएफको जित सुनिश्चित गरे । आवास लामिछानेको प्रहारलाई गोलरक्षक सुर्यले विफल पारेपनि रिबाउन्डमा नविनले खाली पोस्टमा सहजै गोल गरेका थिए ।

अब एपिएफले उपाधिको लागि आर्मी र मनाङबीचको विजेतासँग खेल्नेछ । दोस्रो सेमिफाइनल विहीबार हुनेछ । मनाङले पुलिसलाई २–० ले पराजित गर्दै अन्तिम चारमा स्थान बनाएको थियो भने आर्मीले थ्री स्टारलाई १-० ले पराजित गरेको थियो ।

प्रतियोगितामा ए डिभिजनका ८ सहित १० टोलीले सहभागिता जनाएका थिए । आहा गोल्डकपको विजेताले उपाधिसहित १० लाख १ हजार रुपैयाँ र दोस्रो हुनेले टोलीले ५ लाख १ हजार रुपैयाँ प्राप्त गर्नेछ । प्रतियोगितामा १ करोड ६ लाख ४८ हजार ५ सय रुपैयाँ खर्च हुने अनुमान गरिएको छ ।

पहिलो वर्ष क्याराभान गोल्ड कपसहित २१ वर्षदेखि निरन्तर सञ्चालन भएको यस प्रतियोगितामा बचत हुन आएको रकम क्लबद्वारा संचालित सुर्य बहादुर केसी स्मृति सहारा फुटबल एकेडेमीमा खर्च गरिनेछ । एकेडेमीमा हाल तेस्रो ब्याचमा १४ जिल्लाका २४ जना बालकहरु आश्रित छन् । २०७० साल देखि उनीहरु आवसिय रुपमा निशुल्क स्वास्थ्य, शिक्षा लगायत फुटबल प्रशिक्षण समेत सहारा फुटबल एकेडेमी गण्डकी प्रदेश, पोखरा–१७ स्थित दोविल्लामा प्रदान गर्दै आईरहेका छ ।

आहा रारा गोल्डकपको सम्पूर्ण खेल तालिका तथा नतिजाको लागि यहाँ थिच्नुहोस