काठमाडौं (हाम्रो खेलकुद) – लिग च्याम्पियन बनिसकेको मछिन्द्र फुटबल क्लब कतार एअरवेज सहिद स्मारक ‘ए’ डिभिजन लिगको अन्तिम खेलसम्म अपराजित रहन सफल भएको छ ।

लिगको आफ्नो अन्तिम खेलमा विभागीय नेपाल एपिएफ फुटबल क्लबलाई २–१ ले पराजित गर्दै मछिन्द्र लिगमा अपराजित रहन सफल भएको हो । मछिन्द्रको जितमा अभिषेक गुरुङ र रेजिन सुब्बाले गोल गरे । एपिएफका प्रदीप लामाले एक गोल फर्काए ।

त्रिपुरेश्वरस्थित दशरथ रंगशालामा शनिबार भएको खेलको छैटौं मिनेटमा अभिषेक गुरुङको प्रहारलाई एपिएफका गोलरक्षक युया कुरियामा बचाउँदा मछिन्द्र अग्रता लिनबाट चुक्यो ।

११औं मिनेटमा विकी तामाङको क्रसमा आशिष लामाको प्रयासलाई गोलरक्षक विशाल श्रेष्ठले बचाए । २२औं मिनेटमा आवास लामिछानेले सुवर्ण अवसर पाएपनि उनको पेनाल्टी बक्सभित्रको प्रहार फितलो बन्यो । ३६औं मिनेटमा कप्तान नविन लामाको क्रसमा राजन गुरुङको हेडरलाई गोलरक्षक विशालले सहजै बचाए ।

३८औं मिनेटमा प्रदीप लामाको क्रसमा आशिष लामाले बक्सभित्र सुनौलो मौका चुकाउँदा एपिएफ अग्रता लिनबाट चुक्यो । ४०औं मिनेटमा विमल घर्तीमगरको पासमा अभिषेक रिजालको प्रहार पोस्टबाट थोरै आकासियो । ४२औं मिनेटमा अभिषेक गुरुङले गोल गर्दै मछिन्द्रलाई सुरुवाती अग्रता दिलाए । आन्द्रेस नियाको पासमा उनले गोलरक्षक युया अघि बढेको अवस्थामा खाली पोस्टमा गोल गरे ।

खेल पछि परेको एपिएफले दोस्रो हाफमा मछिन्द्रलाई लगातार दवावमा राखेपनि गोलको लागि ६९औं मिनेटमा कुर्नुपरेको थियो । ६९औं मिनेटमा प्रदीप लामाले गोल गर्दै खेललाई १–१ गोलको बराबरीमा ल्याए । सब्सिच्युट मणि कुमार लामाको पासमा प्रदीपले गोलरक्षक विशाल अघि बढेको अवस्थामा खाली पोस्टमा बललाई जाली चुमाए ।

७४औं मिनेटमा एपिएफले पेनाल्टीको अपिल गरेपनि रेफ्रीले त्यसमा कुनै प्रतिक्रिया दिएनन् । अर्मानढ विडोउमको पासमा वान भर्सेस वानको स्थितिमा ओमोलाजा नुरेन करिमले रवि थिङलाई फउल गरेको देखिएको थियो ।

८१औं मिनेटमा मिनेटमा रेजिन सुब्बाले गोल गर्दै मछिन्द्रलाई २–१ को अग्रता दिलाए । आन्द्रेस नियाको पासमा अभिषेकले अफसाइड बिट ट्याप गर्दै सहज गोल गर्न सफल भएका थिए । ८८औं मिनेटमा दुवै टोली १० खेलाडीमा समेटिन पुगे । आवास लामिछाने र सोनाम जान्ग्पो भुटिया रातो कार्ड खाँदै मैदानबाट बाहिरिए । त्यसपछि थप गोल निस्कन नसक्दा मछिन्द्र विजयी हुन सफल भयो ।

च्याम्पियन र अपराजित रहने क्रममा मछिन्द्रले १३ खेलबाट ३५ अंक जोड्यो । मछिन्द्रले लिगमा त्रिभुवन आर्मी क्लब र संकटा क्लबसँग गोलरहित बराबरी खेल्दा ११ खेलमा जित निकाल्यो । मछिन्द्रसँगको हारसँगै एपिएफको १३ खेलपछि अपराजित यात्रामा पूर्णविराम लागेको छ । एपिएफले लिगमा ९ खेल र आहा रारामा चार खेलमा अपराजित रहेको थियो ।

पराजित एपिएफ १३ खेलबाट १६ अंक जोडेर सातौं स्थानमा रह्यो । उपाधिसँगै मछिन्द्रले ७५ लाख र शिल्ड जितेको छ । दोस्रो भएको आर्मीले ५० ला तथा तेस्रो भएको एनआरटीले २५ लाख रुपैया पाएको छ ।