काठमाडौं(हाम्रो खेलकुद)– फुटबलका सबै खाले गतिविधिबाट प्रतिबन्ध लागेको एक बर्षभन्दा लामो समय पछि अखिल नेपाल फुटबल संघ (एन्फा) का पूर्व अध्यक्ष गणेश थापाले सुविधाको गाडी फिर्ता गरेका छन् ।

अध्यक्ष रहँदा र प्रतिबन्धयता पनि थापाले एन्फाको फर्चुनर गाडी चढ्दै आएका थिए । कात्तिक ८ गते नरेन्द्र श्रेष्ठ एन्फा अध्यक्षमा निर्वाचित भएपछि थापाको औपचारिक रुपमै एन्फाबाट विदाई भएको थियो । प्रतिबन्धमा रहँदा पनि थापासँग गाडी फिर्ता गर्न एन्फाका अन्य पदाधिकारीले पहल गरेका थिएनन् ।

एन्फा अध्यक्ष श्रेष्ठले पूर्व अध्यक्ष थापाले गाडी फिर्ता गरिसकेको शुक्रबार बसेको केन्द्रिय समिति बैठकमा जानकारी दिएको सदस्य पंकज नेम्बाङले बताए । मैले आफ्नो तर्फबाट एन्फाका गाडीका विषयमा छलफल गर्न एजेन्डा पठाएको थिए , अध्यक्षले पूर्व अध्यक्षले चढेको गाडी फिर्ता भएको जानकारी दिनुभयो, कुरा गर्दा नेम्बाङ, एन्फाले अर्को एउटा जिप र कार किन्ने निर्णय गरेको छ ।

व्यवस्थापिका संसद सदस्य समेत रहेका थापालाई गत बर्ष कात्तिक ३० गते फिफा एथिक्स कमिटिले भ्रष्टाचारको अभियोगमा १० वर्षे प्रतिबन्धसहित झन्डै २१ लाख रुपैयाँ जरिवाना तोकेको थियो । फिफाले आफूमाथि अन्याय गरेको उल्लेख गर्दै त्यति बेला थापाले कोर्ट अफ आर्बिट्रेसन फर स्पोटर्स (सिएएस) सम्म जाने सक्ने बताएका थिए । तर, त्यसपछि थापाले यो विषयमा केही बताएका छैनन् ।