काठमाडौं (हाम्रो खेलुकुद) – ‘ए’ डिभिजन क्लब न्युरोड टिम (एनआरटी) ले मलेसियामा टुवान याङ टेरुतमा (टीवाईटी) कप फुटबल प्रतियोगिता खेल्ने भएको छ ।

क्लबका महासचिव नरेन्द्रमान श्रेष्ठले जारी गरेको विज्ञप्तिमा एनआरटीले आसन्न ए डिभिजन लिगलाई लक्षित गर्दै ‘प्रि–सिजन’ मा मलेसियाको पेनाङमा हुने टुवान याङ टेरुतमा (टीवाईटी) कप फुटबल प्रतियोगिता खेल्ने उल्लेख गरेको छ ।

यो प्रतियोगिता पेनाङका शहर प्रमुख मिस्टर याङले पदबहाली ग्रहण गरेको पहिलो बार्षिकोत्सवको अवसरमा हुन लागेको हो । २८ जुनदेखी २ जुलाईसम्म हुने प्रतियोगितामा एनआरटीसहित मलेसियाको सुपर लिग क्लब पेनाङ एफसी र बंगलादेश प्रिमियर लिगको क्लब मुक्तिजोधा सङसद केसीले प्रतिस्पर्धा गर्नेछन् ।

२० हजार दर्शक क्षमता भएको पेनाङ सिटी रंगशालामा हुने प्रतियोगिताको विजेताले १० हजार मलेसियन रिङगेट पुरस्कार जित्नेछ । उपविजेता टोलीले ५ हजार मलेसियन रिङगेट पुरस्कार जित्नेछ ।

एनआरटीले उक्त प्रतियोगितालाई लक्षित गर्दै खेलाडी अनुबन्ध प्रक्रिया थालिसकेको र केही दिनमै प्रशिक्षण शुरु गरिने जनाएको छ । एनआरटीले मलेसिया जानुअघि नेपालमै केही अभ्यास खेल पनि खेल्ने तयारी गरेको छ । क्लबले दक्षिण पूर्वी एसियाको अन्य क्लबहरुसँग मैत्रीपूर्ण खेल खेल्ने योजना बनाएको छ ।

वि.स. १९९१ मा स्थापना भएको एनआरटीले हालसम्म पाँचपटक ‘ए’ डिभिजन लिगको उपाधि जितिसकेको छ । गत फागुनमा सम्पन्न लिगमा एनआरटी तेस्रो भएर सिजनको अन्त्य गरेको थियो ।