काठमाडौं (हाम्रो खेलकुद)– रुस्लान थ्री स्टार क्लबले एएफसी कपको प्ले अफ खेल्न बाट बञ्चित भएको विषयलाई लिएर आज पत्रकार सम्मेलनमार्फत छ करोडको क्षतिपुर्ति माग गरेको छ ।
अगस्टमा एएफसी कपको समूह चरणमा विजेता बनेर छनोट भएको थ्री स्टार अखिल नेपाल फुटबल संघ (एन्फा)को लापरवाहीका कारण प्ले अफ खेल्नबाट बञ्चित भएको थियो ।
पटक पटक क्लब दर्ताका लागि एसियाली फुटबल महासंघ (एएफसी) ले पत्राचार गरेपनि एन्फाले न त आफै त्यसको जवाफ दियो न थ्री स्टारलाई पनि कुनै सुचना नै दियो । उल्टो एएफसीको पटक पटकको इमेललाई वेवास्ता मात्र गरिरह्यो । जसका कारण पहिलो पटक आयोजना हुने एएफसी कपमा छनोट चरण पार गरेर पनि थ्री स्टार खेल्नबाट बञ्चित भएको हो।
एन्फाले सचिवालय कमजोरी भएको स्वीकार्दै हालै उपाध्यक्षमा मनोनित वीरबहादुर खड्काको संयोजकत्वमा छानविन समिति गठन गरेको छ । थ्री स्टारको ठाँउ एएफसीले समूह चरणमा दोस्रो भएको मंगोलियाको इर्चिम क्लबलाई मौका दिएको छ ।
थ्रि स्टारले यो विषय समाधान नभएसम्म कुनै पनि फुटबल गतिविधिमा संलग्न नहुने जानकारी दिएको छ।
