काठमाडौं (हाम्रो खेलकुद) – फ्रेन्ड्स र सरस्वती युथ क्लबसँगै महिला समितिले आगामी असार ६ गते हुने अखिल नेपाल फुटबल संघ (एन्फा) को निर्वाचनका लागि मताधिकार फिर्ता पाएका छन् ।

यसअघि एन्फा निर्वाचन समितिले चार मतदाताको मताधिकार वञ्चित गरेको थियो । तर पुनरावेदन समितिको सोमबार बसेको बैठकले पुनरावेदन गरेका चारमध्ये फ्रेन्ड्स, सरस्वती र एन्फा महिला संघलाई मताधिकार दिने निर्णय गरेको हो ।

निर्वाचन समितिले निर्णय गरेबमोजिम नै सिराहा जिल्लाको मताधिकार पुनरावेदन भने बदर भएको छ । समितिले सिराहा जिल्लाका प्रविणकुमार यादवको नाम मतदाता नामावलीबाट हटाउने गरी भएको निर्णय मिलेको देखिएको उल्लेख गर्दै सदर हुने ठहर गरेको छ ।

निर्वाचन समितिले अन्तिम मतदाता नामावली प्रकाशनमा गर्ने क्रममा महिला संघ, सरस्वती क्लब, फ्रेन्ड्स क्लब र सिरहा जिल्लाको मताधिकार बदर हुने निर्णय गरेको थियो । त्यस निर्णयविरुद्ध चारै जनाले पुनरावेदन समितिमा निवेदन दिएका थिए ।

सिन्धुली जिल्लाले पनि मताधिकार पाउनु पर्ने दावी गर्दै अपिल गरेको थियो । तर एन्फाको निर्देशन र पुनरावेदन साथ पेस भएको कागज हेर्दा निर्देशन पालना नगरी आफू खुशी प्रतिनिधि छनोट गरेको र पुनरावेदकको जिकिर नपुग्ने पुनरावेदन समितिले उक्त अपिल निमलेको भन्दै मताधिकार नदिने निर्णय गरेको छ ।

निर्वाचन समितिले बदर गरेको चारै मत कर्माछिरिङ शेर्पा पक्षका थिए । तीन मताधिकार फिर्ता भएसँगै शेर्पा पक्षलाई केही राहत मिलेको छ ।

एन्फाको निर्वाचनका लागि वर्तमान अध्यक्ष शेर्पा र वरिष्ठ उपाध्यक्ष पंकज विक्रम नेम्वाङ प्यानल नै बनाएर चुनावी मैदानमा उत्रिएका छन् । राजीव राज पौड्यालले पनि प्यानल विना नै अध्यक्षमा उम्मेदवारी दिएका छन् ।