एभर्टन (एजेन्सी)– एस्ले विलियम्सले एभर्टनका लागि पहिलो गोल गरेपछि टोलीले प्रिमियर लिगमा दोस्रो स्थानको आर्सनललाई २–१ ले पराजित गरेको छ । अर्को खेलमा साविक विजेता लेस्टरले हार बेहोरेको छ ।
लिगका पछिल्ला पाँच खेलमा जित हासिल गर्न सकेको एभर्टन गए राती भएको खेलमा २० औं मिनेटमा पछि परेको थियो । आर्सनलका लागि एलेक्स सान्चेजले फ्रिकिकमा गोल गरेका थिए । उनको प्रहार विलियम्समा डिफ्लेक्ट हुँदै गोलमा परिणत भएको थियो । तर, घरेलु टोलीले पहिलो हाफको अन्त्यतिर खेललाई बराबरीमा पुर्याएको थियो । सिमुस कोलेमनले लेइगटोन बेन्सको क्रसमा हेड गोल गरेका थिए । डोमिनिक काल्र्भेट लिविनले डेब्यू गरेको खेलमा एभर्टनले सफल नतिजा निकालेको थियो ।
विलियम्सले खेल सकिन ४ मिनेट बाँकी रहँदा विजयी गोल गर्नुअघि आर्सनलले गोल थप्ने अवसर चुकाएको थियो । रोस बार्केलेको प्रहार पोस्ट नजिकबाट बाहिरिदा फिल जागिल्काको आक्रमणलाई गोलकिपर पिटर चेकले जोगाएका थिए । जागिल्काले अन्तिम मिनेटमा दोहोरो पहेलो कार्ड पाउँदै मैदान छोडेपछि एभर्टनले १० खेलाडीमा सिमित हुँदै खेलको अन्त्य गरेको थियो ।
प्रिमियर लिगमा आर्सनलले दोस्रो हार बेहोरेपछि शीर्षस्थानको चेल्सीसँग अंक दुरी अझै बढ्ने सम्भावना बनेको छ । १५ खेलमा चेल्सीको ३७ अंक छ भने एक खेल बढीमा आर्सनलको ३४ अंक छ । २३ अंकसहित एभर्टन सातौं स्थानमा छ ।
सिजनमा पहिलो रोजाइमा परेको खेलमै मार्क पुगले गोल गरेपछि ब्रोनमाउथ साविक विजेता लेस्टर सिटीलाई हराउन सफल भएको हो । उनले ३४ औं मिनेटमा गरेको गोल नै टोलीको जितका लागि पर्याप्त रह्यो । लेस्टर १६ अंकसहित १४ औं स्थान छ । २१ अंक जोडेको ब्रोनमाउथ आठौं स्थानमा छ ।
