एजेन्सी – उरुग्वेली युवा स्टार डार्विन नुनेज इंग्लिस क्लब लिभरपुलमा अनुबन्धित भएका छन् । लिभरपुलले नुनेजलाई पोर्चुगिज क्लब बेन्फिकाबाट क्लबको कीर्तिमानी मुल्य ८५ मिलियन पाउन्डमा ६ वर्षको लागि अनुबन्ध गरेको हो ।

क्लबले उनलाई आधिकारिक रुपमा सार्वजनिक गरेको छ । यो सम्झौतासँगै उनी सन् २०२८ को सिजनको अन्त्यसम्म एनफिल्डमा रहनेछ । लुइस सुआरेज र सेबास्टियन कोट्सपछि एनफिल्डमा अनुबन्ध हुने तेस्रो उरुग्वेली खेलाडी बनेका नुनेजले यो सिजनका लागि २७ नम्बरको जर्सी लगाउनेछन् ।

नुनेजको सम्झौता ६४ मिलियन पाउन्डबाट अघि बढ्नेछ । विज्ञापनबाट झन्डै २१ मिलियन पाउन्ड थपिनेछ । यसले नुनेजलाई लिभरपुलको इतिहासमा सबैभन्दा महँगो खेलाडी बन्नेछन् । यसअघि लिभरपुलले २०१८ मा डिफेन्डर भर्जिल भान डाइकलाई क्लबको कीर्तिमानी मुल्य ७५ मिलियन पाउन्ड खर्चिएको थियो ।

नुनेजले बेन्फिकाका लागि गत सिजन सबै ४१ खेलमा ३४ गोल गर्न सफल भएका थिए । उनले पोर्चुगिज लिगमा २८ र च्याम्पियन्स लिगमा ६ गोल गरेका थिए । उरुग्वेका लागि ११ क्याप जितिसकेका नुनेजले २०२१–२२ को सिजनमा बेन्फिकाका लागि २८ खेलमा २६ गोल गरे । तिमध्ये २५ गोलहरु सुरुवाती खेलमा थियो । पोर्चुगिज लिगको शीर्ष गोलकर्ता बनेका नुनेजले च्याम्पियन्स लिगको १० खेलमा ६ गोल गरेका छन् । उनले लिभरपुलविरुद्धको क्वाटरफाइनलको दुवै लेगमा गोल गर्न सफल भएका थिए ।

‘म यहाँ लिभरपुलमा आउन पाउँदा साँच्चै खुसी र हर्षित छु । यो ठूलो क्लब हो ।’ उनले भने, ‘म लिभरपुलमा धेरै ट्रफीहरू जित्न चाहन्छु ।’ नुनेजले थपे, ‘मैले लिभरपुलविरुद्ध खेलेको छु र मैले तिनीहरूलाई च्याम्पियन्स लिगमा धेरै खेलहरूमा देखेको छु, र यो मेरो खेल्ने शैली हो । यहाँ केही उत्कृष्ट खेलाडीहरू छन् र मलाई लाग्छ कि यो मेरो खेल शैली अनुरूप हुनेछ ।’

‘जब म प्रशिक्षण मैदानमा पुगे, म यहाँको सेटअप र संरचनासँगै सबै ट्रफीहरु देखेर साँच्चै छक्क परे ।’ लिभरपुलमा अनुबन्ध भएपछि नुनेजले भने, ‘त्यसपछि तपाई आँफैले धेरै ट्रफीहरु जितेको कल्पना गर्न सक्नुहुन्छ र पछि जब तपाई फेरि यहाँ आउनुहुन्छ, प्रदर्शनीमा राखिएका ट्रफी देखेर भन्न सक्नुहुन्छ म पनि कुनै समयमा यस ट्रफीको हिस्सा थिए । म लिभरपुल आउनुको कारण पनि ट्रफी र उपाधि जित्नु हो ।’

लिभरपुलले गत सिजन कारवाओ कप र एफए कप जित्न सफल भएको थियो । प्रिमियर लिगमा उपविजेता तथा च्याम्पियन्स लिगमा फाइनलमा स्पेनिस क्लब रियल म्याड्रिडसँग पराजित भयो ।

पोर्चुगिज १९ वर्षीय फाबियो कार्भाल्हो मे महिनामा लिभरपुलको ग्रीष्मकालीन स्थानान्तरण विन्डोमा हस्ताक्षर गर्ने पहिलो खेलाडी बनेका थिए । यि फरवार्ड १ जुलाईमा फुलहमबाट आधिकारिक रूपमा लिभरपुलमा सामेल हुनेछन् ।

रेड्सले सेनेगलका फरवार्ड साडियो मानेका लागि बायर्न म्युनिखबाट ३० मिलियन पाउन्डको प्रस्ताव अस्वीकार गरिसकेको छ । इजिप्टियन स्टार मोहम्मद सलाह जस्तै नयाँ सम्झौतामा सम्झौता हुन नसकेमा अर्को समरमा फ्री एजेन्ट बन्न तयार छ । क्लोपको कार्यकालमा लिभरपुलको आक्रमणको अर्को प्रमुख सदस्य ब्राजिली फरवार्ड रोबर्टो फिर्मिनोले पनि आफ्नो सम्झौताको अन्तिम वर्षमा रहेका छन् ।