एजेन्सी – इंग्लिस क्लब लिभरपुलले जापानिज मिडफिल्डर ताकुमी मिनामिनोलाई फ्रान्सेली क्लब मोनाकोमा बेच्न सहमत भएको छ । लिभरपुलले मिनामिनोलाई १५.५ मिलियन पाउण्डमा मोनाकोमा बेच्न सहमत भएको हो ।

मोनाको २७ वर्षीय मिनामिनोको चासो राख्ने मध्येको एक क्लब हो । मिनामिनो २०२० मा अष्ट्रियन क्लब रेडबुल साल्जवर्गबाट ७.२५ मिलियन पाउन्डमा लिभरपुलमा आबद्ध भएका थिए । सम्झौता अनुसार मिनामिनोले १२.९ मिलियन पाउन्ड पारिश्रमिक र २.६ मिलियन युरो एडअनबाट प्राप्त गर्नेछ ।

लिभरपुलका लागि ५५ खेल खेलेका मिनामिनोले १४ गोल गरेका छन् । गत सिजन इंग्ल्यान्डको घरेलु कपमा उनी सर्वाधिक गोलकर्ता बनेका थिए । लिभरपुलले एफए कप र लिग कप जित्दा मिनामिनोले ७ गोल गरेका थिए । यद्यपि, लिभरपुल म्यानचेस्टर सिटीभन्दा एक अंक पछाडि पर्दै प्रिमियर लिग जित्नबाट वञ्चित रह्यो ।

उनले प्रिमियर लिगमा एक पटक पहिलो रोजाईसहित ११ खेलमा मात्रै मौका पाए । मिनामिनोले केही समय अर्काे इंग्लिस टोली साउथह्याम्टनमा लोनमा खेलेका थिए । लोन अवधि सकाएर उनी लिभरपुलमा फर्किएका थिए । त्यसपछि उनले लिभरपुलका लागि १० खेलमा अवसर पाए ।

सेनेगलका फरवार्ड साडियो माने पनि लिभरपुल छाड्ने नजिक छन् । लिभरपुलले मानेका लागि ३५.१ मिलियन पाउन्डमा बायर्न म्युनिखका लागि सहमति जनाइसकेको छ । लिभरपुलले पोर्चुगिज क्लब बेन्फिकाबाट उरुग्वेली फरवार्ड ६४ मिलियन पाउन्डमा अनुबन्ध गरिसकेको छ ।

यस्तै फरवार्ड फाबियो कार्भाल्होलाई ५ मिलियन पाउन्डमा तथा एबरडीनका १८ वर्षीय फुलब्याक क्याल्भिन रामसेलाई ४.२ मिलियन पाउण्डमा अनुबन्ध गरिसकेको छ ।