काठमाडौं (हाम्रो खेलकुद) – नेपाली मिडफिल्डर रोहित चन्दले ब्राजिल तथा विश्व फुटबलका हस्ती रोनाल्डिन्होसँग खेल्न पाउनु आफ्नो लागि ठूलो अवसर भएको बताएका छन् ।

आइतबार आफ्नो फेसबुक एकाउन्टमार्फत रोनाल्डिन्होसँगको फोटो सेयर गर्दै उनले उक्त कुरा व्यक्त गरेका हुन् ।इण्डोनेसियामा व्यवसायिक फुटबल खेलिरहेका रोहितले लेखेका छन्, ‘विश्व फुटबलका महान् हस्ती रोनाल्डिन्हो सरसँग मैदान शेयर गर्न पाउनु मेरा लागि एक अद्भुत अनुभव रह्यो जीवनमा उहाँसँग भेट होला, एकै मैदानमा खेल्न पाउला भनेर कल्पना पनि गरेको थिइन् । रोनाल्डिन्होको जाँदु भरिएको खेल हेर्दै हुर्किएको मेरो लागि अहिले उहाँसँग मैदान शेयर गर्नु ठुलो अनुभज र आशिषको कुरा हो ।’

रोहित लामो समयदेखि इन्डोनेसियामा व्यवसायिक फुटबल खेल्दै आइरहेका छन् । उनी यस सिजन पेर्सिक केडिरी एफसीमा आबद्ध भएका छन् । गत साता रोहित सम्मिलित पेर्सिकले ट्रोफियो रोनाल्डिन्हो मैत्रीपूर्ण फुटबल प्रतियोगिताको उपाधि जितेको थियो । मालाङस्थित कान्जुरुहान स्टेडियममा भएको मैत्रीपूर्ण प्रतियोगितामा आफ्नो दुई खेलमा नै सफलता हात पार्दै पेर्सिकले उपाधि जित्न सफल भएको थियो ।

पेर्सिकले पहिलो खेलमा ब्राजिली लेजेन्ड रोनाल्डिन्होसम्मिलित रेन्स नुसनतारा एफसीलाई टाइब्रेकरमा ४–२ ले तथा दोस्रो खेलमा एरेमा एफसीलाई टाइब्रेकरमै ५–४ ले पराजित गर्दै उपाधि जित्न सफल भएको हो ।

नेपाली मिडफिल्डर रोहितले रेन्स नुसनतारा एफसीविरुद्ध पहिलो रोजाईमा खेलेका थिए । उनले विश्व चर्चिच ब्राजिली लेजेन्ड रोनाल्डिन्होविरुद्ध पहिलो रोजाईमै खेल्ने मौका पाएका थिए ।

चर्चित इन्डोनेसियन सेलिब्रिटी गायक तथा टिभी पर्सनलिटी रफी अहमद र रुडी सलिमको स्वामित्वमा रहेको रेन्स नुसनतारा एफसी यसै सिजन इन्डोनेसियाको दोस्रो डिभिजन लिग टुबाट शीर्ष डिभिजनमा बढुवा भएपछि क्लबका मालिकद्धयले आफ्ना समर्थकहरुलाई सरप्राईज दिने लक्ष्यसहित गत मार्चको अन्तिमतिर बालोन डि’ओरसँगै ब्राजिलका लागि विश्वकप, कोपा अमेरिका कपसँगै क्लब फुटबलबाट थुप्रै उपाधि जितिसकेका लेजेन्ड रोनाल्डिन्होलाई इन्डोनेसियामा फुटबल खेल्न बोलाउने वाचा गरेका थिए ।

त्यही वाचाअनुसार रोनाल्डिन्हो रेन्स नुसनतारा एफसीबाट एक खेल खेल्न सहमत भएको हो । ४२ वर्षीय रोनाल्डिन्होले क्लब फुटबलमा बार्सिलोना, पिएसजी र एसी मिलान जस्ता चर्चित क्लबबाट व्यवसायिक खेल पस्कदै आफ्नो कला देखाइसकेका छन् ।