मिडल्सब्रो (एजेन्सी)– एडम लालानाले दुई गोल गर्नुका साथै अर्को गोलका लागि भूमिका निभाएपछि लिभपरपुलले प्रिमियर लिगमा बुधबार मिडल्सब्रोलाई ३–० ले हराएको छ । जितपछि लिभरपुल गोलअन्तरमा आर्सनललाई पछि पार्दै दोस्रो स्थानमा उक्लेको छ । दुवैको समान ३४ अंक छ भने शीर्षस्थानको चेल्सीको ४० अंक पुगेको छ ।

चेल्सीले अर्को खेलमा सन्डरल्यान्डमाथि १–० को जित हासिल गरेको थियोे । २९ औं मिनेटमा नाथालियन क्लेनीको क्रसमा मिडफिल्डर लालानाले हेडमार्फत गोल गरे । लालानाको पासमा डिभोक ओरिगीले ६० औं मिनेटमा गोल गरे । ओरिगीले लगातार पाँचौं खेलमा टोलीका लागि गोल गरेका हुन् । त्यसको आठ मिनेटपछि ओरिगीको पासमा लालानाले नजिकबाट गोल गरेका थिए ।

लिगका अन्य खेलमा  म्यानचेस्टर सिटी, टोटेनह्याम, म्यानचेस्टर युनाइटेड जस्ता शीर्ष टोली पनि विजयी भएका छन् । त्यस्तै वेस्ट ह्याम युनाइटेड र वेस्ट ब्रुमविचले पनि जित निकालेका छन् भने स्टोक र साउथ ह्याम्टनले बराबरी खेलेका छन् ।