एजेन्सी – क्याटलान क्लब बार्सिलोनाले नयाँ सिजनको स्पेनिस ला लिगाका लागि यसै समरमा क्लबमा आबद्ध गरेका पाँचमध्ये चार खेलाडीलाई ला लिगामा दर्ता गरेको छ ।

ला लिगाले बार्सिलोनाले यसै समरमा आबद्ध गरेका ५ मध्ये ४ नयाँ खेलाडी दर्ता भएको र लिग खेल्न योग्य भएको जनाएको छ । रोबर्ट लेवान्डोस्की, राफिन्हा, फ्रान्क केसी र एन्ड्रियस क्रिस्टेनसेन ला लिगामा दर्ता भएका हुन् ।

दर्ता भएका चारै खेलाडीले सिजनको पहिलो खेल खेल्न पाउनेछन् । डिफेन्डर जुल्स कुन्डे दर्ता भएका छैनन् । बार्सिलोनाले सिजनको पहिलो खेलमा शनिबार राति रायो भालेकानोविरुद्ध खेल्दै नयाँ सिजनको ला लिगाको शुरुवात गर्नेछ ।

फाइनान्सियल फेयर प्लेको कडाईको कारण बार्सिलोनालाई खेलाडी दर्ता गर्न समस्या भइरहेको छ । चरम आर्थिक समस्याको बाबजुत बार्सिलोनाले यो समरमा स्टार पाँच खेलाडी अनुबन्ध गरेको थियो । आर्थिक समस्या हुँदा समेत खेलाडी अनुबन्धमा आक्रामक देखिएपछि ला लिगाले बार्सिलोनामाथि अनुसन्धान गरेको थियो ।

यस्तै सम्झौता नविकरण गरेका औसमाने डेम्वेले र सजी रोबर्टाे पनि ला लिगामा दर्ता भएका छन् । कुन्डे दर्ताको लागि बार्सिलोनाले पारिश्रमिकमा व्यापक कटौती गर्न आवश्यक छ । कुन्डे दर्ताका लागि क्लबले क्लबको टेलिभिजन अधिकार र उनीहरुको मिडिया उत्पादनको शेयर बेच्ने योजनामा छ ।

शुक्रबार बार्सिलोनाले १ सय मिलियन युरोको अतिरिक्त २४.५ प्रतिशत बार्साको स्टुडियो बेचेका थिए । जसले ला लिगालाई सन्तुष्ट पार्न र बार्सिलोनालाई केही नयाँ खेलाडी दर्ता गर्न सहज भएको थियो ।

बार्सिलोनाले रोबर्ट लेवान्डोस्कीलाई जर्मन क्लब बायर्न म्युनिखबाट तथा राफिन्हालाई इंग्लिस क्लब लिड्स युनाइटेडबाट आबद्ध गरेका थिए । फ्रान्क केसीलाई इटालियन क्लब एसी मिलान र आन्द्रेस क्रिस्टेन्सेनलाई इंग्लिस क्लब चेल्सीबाट फ्रि ट्रान्सफरमा आबद्ध गरेको थियो । जुल्स कुन्डेलाई बार्सिलोनाले सेभियाबाट महँगो मुल्यमा अनुबन्ध गरेका थिए ।