काठमाडौं (हाम्रो खेलकुद) – नेपाली राष्ट्रिय महिला फुटबल टोलीको डिफेन्डर पुजा रानाले प्रशिक्षणका दौरान बोकेको चोटका कारण साफ च्याम्पियनसिप गुमाउने देखिएको छ ।

आइतबार प्रशिक्षणका दौरान गोलरक्षकसँग ठोक्किन पुग्दा उनको बायाँ खुट्टामा चोट लागेको थियो । प्रारम्भिक परिक्षण अनुसार उनको खुट्टा भाँचिएको आशंका गरिएको छ । चोटको विस्तृत विवरण भोली थाहा हुने बुझिएको छ । चोटको प्रकृति हेर्दा उनले अर्को महिना हुने साफ च्याम्पियनसिप भने गुमाउने सम्भावना छ ।

सन् २०१९ मा विराटनगरमा भएको साफ च्याम्पियनसिपबाट राष्ट्रिय टोलीमा डेब्यु गरेकी पुजा निरन्तर टोलीमा रहेकी थिइन् । उनी नेपाल पुलिस क्लबको पहिलो रोजाइमा खेल्दै आएकी छिन् । उमेर समूहमा नेपालको कप्तानी समेत गरेकी उनले सन् २०१५ मा यू-१४ टोलीलाई दशरथ रंगशालामा खेल्दा नै कप्तानी गर्दै फाइनल पुर्याएकी थिइन् ।

साफका लागि राष्ट्रिय टोलीको दोस्रो चरण छनोटमा हाल ३५ खेलाडी रहेका छन् । दशरथ रंगशालामा हुने प्रतियोगिता भदौ २१ देखि असोज ३ गतेसम्म चल्नेछ । नेपाल रहेको समूह बी मा भुटान र श्रीलंका रहेका छन् । आयोजक नेपालले उद्घाटन खेलमा भुटानको सामना गर्नेछ । खेल भदौ २१ गते साँझ ५:३० बजे हुनेछ । दोस्रो तथा समूह चरणको अन्तिम खेलमा नेपालले भदौ २८ गते श्रीलंकासँग खेल्नेछ ।

भदौ ३१ गते सेमिफाइनलका दुई खेल हुनेछ । त्यसपछि असोज ३ गते फाइनल हुनेछ । सहभागी ७ टोलीलाई दुई समूहमा विभाजन गरेको छ । समूह चरणको खेलपछि समूहको शीर्ष दुई टोलीले सेमिफाइनलमा स्थान बनाउने छन् । यस्तै समूह ‘ए’ मा साविक विजेता भारत, माल्दिभ्स, बंगलादेश र पाकिस्तान छन् ।

नेपालको ३५ सदस्यीय टोली :

गोलरक्षक : एन्जिला तुम्बापो सुब्बा, अन्जना रानामगर, उषा नाथ, कविता विक

डिफेन्डर : हिराकुमारी भुजेल, सिर्जना सिंह ठकुरी, गंगा गुरुङ, अमृता जैशी, गीता राना, पुजा राना, पुनम जर्घा मगर, निशा थोकर, सिर्जना चेम्जोङ, विमला विक, समिक्षा घिमिरे

मिडफिल्डर : विमला चौधरी, मन्जली कुमारी योन्जन, सविता रानामगर, प्रिती राई, सरु लिम्बु, दिपा राई, दिपा शाही, इन्दिरा राई, सरस्वती ऐर, अनिता बस्नेत, हिमा चौधरी, कुसुम खतिवडा

फरवार्ड : सावित्रा भण्डारी, अमिषा कार्की, रेखा पौडेल, अनिता केसी, रश्मीकुमारी घिसिङ, रजनी थोकर, निर्मला विक, चन्द्रा भण्डारी