सिलिगुडी (हाम्रो खेलकुद) – नेपाली राष्ट्रिय महिला फुटबल टोलीका प्रमुख प्रशिक्षक कुमार थापाले नेपाल साफ च्याम्पियनशिपको उपाधि जितेर नयाँ इतिहास रच्न तयार रहेको अभिव्यक्ति दिएका छन्।
आज भएको पत्रकार सम्मेलनमा बोल्दै प्रशिक्षक थापाले टोलीले प्रतियोगितामा भाग लिन धेरै मेहेनत गरेको र उक्त मेहेनतको फल अब नतिजाले देखाउने बताए। “हामीले प्रतियोगिता खेल्नुपुर्व मलेसियासंग मैत्रीपूर्ण खेल खेल्ने मौका पायौं र त्यो एकदम उत्तम रह्यो प्रतियोगिता सुरु हुनुअघिको खेलले टोलीलाई एकिकृत त बनायो नै, साथसाथै नतिजा राम्रो आउनुलेपनि खेलाडीको मनोबल उच्च रहेको छ”, थापाले भने।
नेपाली टोलीले प्रशिक्षण गरेको वातावरण र सिलिगुडीमा खेल्ने उस्तै रहेकोले टोलीलाई असर नपर्ने बताए। “नेपाल लगातार तिन पटक भारतसंगै हरेको तितो सत्य सबैसामु छ, तर हामी यो पटक त्यसलाई तोडेर उपाधि उठाउने धुनमा छौँ। त्यसको लागि टोलीले भोलि देखि नै पूर्ण मेहेनत गर्नेमा मा विश्वस्त छु।”, थापाले टुंग्याए।
