काठमाडौं (हाम्रो खेलकुद)– अखिल नेपाल फुटबल संघ (एन्फा) को कार्यसमितिको बैठक अर्को साता बस्ने भएको छ । विविधसहित ९ एजेण्डामा छलफल गर्ने गरि कात्तिक २९ गते एन्फा कार्यसमितिको बैठक डाकिएको छ ।

एन्फा महासचिव किरण राईले कार्यसमिति पदाधिकारी र सदस्यलाई मंगलबार पठाएको पत्रमा ९ वटा एजेण्डा समावेश छन् । मार्केटिङ, ब्रोर्डकाष्टिङ, डिजिटल राइट्स, कमर्सियाल स्ट्राटिजी र पार्टनरसिप सम्बन्धी, एन्फा होस्टलको क्यान्टिन भाडामा दिने, फिफा कंग्रेसमा एन्फाको प्रतिनिधित्व, विधान बमोजिम आवश्यक समिति तथा विभिन्न पदाधिकारी नियुक्त बारेमा पनि बैठकमा छलफल गर्न एजेण्डा तय भएको छ ।

त्यस्तै बैठकले मार्चमा हुने फिफा कंग्रेसमा एन्फाको प्रतिनिधित्व बारे, नेपालले प्राप्त गरेको फिफा विश्व कपको टिकट, राष्ट्रिय लिग तथा सहिद स्मारक ए डिभिजन लिग, एकेडेमी सञ्चालन तथा विविध विषयमा छलफल हुनेछ ।

एन्फा अध्यक्ष पंकज विक्रम नेम्बाङले कार्यसमितिमा छलफल विना एसियाली फुटबल महासंघ (एएफसी) को कार्यसमिति सदस्यको मनोनय गरेपछि एन्फाका तीन उपाध्यक्षसहित १२ कार्यसमिति सदस्यले कार्यसमिति बैठकको माग गर्दै असोज २१ गते एन्फामा निवेदन दर्ता गराएका थिए । निवेदन दिएको एक महिना भन्दा पछि एन्फा कार्यसमितिको बैठक बस्ने निश्चित भएको हो ।