पोखरा (हाम्रो खेलकुद)– सिएमजी काठमाडौंले छ्रैठौ एसओएस बगर भाइखलक भेट्रान फुटबलको उपाधि जितेको छ । नाइट किंग सानो गौचरनलाई टाइब्रेकरमा ३–२ ले हराउँदै सिएमजीले उपाधिसहित ७५ हजार रुपैयाँ जित्यो । यी दुई टोलीबीच फाइनलको निर्धारित समय १–१ को बराबरीमा टुंगिएको थियो ।
आकाश गुरुङले फ्रिकिकमा गोल गर्दै नाइट किंगलाई पहिलो हाफमा अग्रता दिलाएका थिए । दोस्रो हाफमा सिएमजीका बिजय गुरुङले पेनाल्टी मार्फत बराबरी गोल फर्काए । पेनाल्टी सुटआउटमा सिएमजीका संजीव वैद्य, कल्याण खड्गी र चेतनारायण श्रेष्ठले गोल गरे । नाइट किंगका सरोज थापा र निमा लामा मात्र गोल गर्न सफल भए । मनु गौतमको पेनाल्टीलाई गोलकिपरले रोकेपछि सिएमजी विजयी बनेको थियो ।
दोस्रो टोलीले ५० हजार रुपैयाँ प्राप्त गर्यो । सिएमजीका संजीत कुमार बैद्य फाइनलका म्यान अफ दी म्याच घोषित भए ।सानो गौचरनका निमा लामा प्रतियोगिताको उत्कृष्ट खेलाडी घोषित भए । ४ गोल गरेका सिएमजीका चेतनारायण श्रेष्ठ सर्वाधिक गोलकर्ता बने । आदिवासी भेट्रान क्लब काठमाडौं अनुशासित टोली घोषित भयो ।
विजेता र उपविजेता टोली खेलाडीलाई पश्चिमाञ्चल क्षेत्रिय प्रहरी प्रमुख प्रहरी नायव महानिरीक्षक कमल सिंह बम, प्रथम पुरस्कार प्रायोजक सरोज गुरुङका पिता बिर वहादुर गुरुङ, दोश्रो पुरस्कार प्रायोजक जापान भिमकाली पाटनका प्रतिनीधी, आयोजक बगर भाइखलकका अध्यक्ष दिल बहादुर गुरुङ पुरस्कृत गरे ।
