काठमाडौं (हाम्रो खेलकुद) – रुस्लान थ्री स्टार क्लबले एएफसी कप २०१७ को प्ले अफ खेल्न नपाउनुको सत्य तथ्य छानविन गर्न अखिल नेपाल फुटबल संघ (एन्फा) ले गठन गरेको समितिले सोमबार प्रतिवेदन बुझाउँदैछ । सचिवालयको कमजोरी भएको स्वीकार गरिसकेको एन्फाले आफुमाथिको आलोचनालाई मथ्थर पार्ने प्रयास स्वरुप मंसिर २४ गते १५ दिनको समय सिमा तोक्दै उपाध्यक्ष वीरबहादुर खड्काको संयोजकत्वमा तीन सदस्यीय छानविन समिति गठन गरेको थियो ।

‘एसियाली फुटबल महासंघ (एएफसी) ले एन्फालाई पठाएको इमेल र त्योसँग सम्बन्धितसँगको छलफलपछि हामीले प्रतिवेदन लगभग तयार गरिसकेका छौं । थोरै बाँकी छ त्यो पनि आज पुरा हुनेछ ’ संयोजक खड्काले भने, ‘ हामीलाई दिएको समय सिमा हिजो सकिएपनि सरकारी विदाका कारण आज दिउँसो सम्म प्रतिवेदन बुझाउने तयारीमा छौं ।’ एन्फा केन्द्रिय सदस्य रमेश रायमाझी र विकास निर्देशक सञ्जिव मिश्र समितिको सदस्य छन् । सोही विषयमा छानविन गर्न राष्ट्रिय खेलकुद परिषद् (राखेप) ले पनि अलग्गै पाँच सदस्यीय समिति गठन गरेको छ ।

एन्फाको लापरवाहीका कारण समूह चरण पार गरेपनि थ्री स्टार एएफसी कप प्ले अफ खेल्नबाट बञ्चित भएको थियो । एएफसीले पटक पटक पत्राचार गर्दा पनि एन्फाले त्यसलाई वेवास्ता गरेपछि थ्री स्टारको सट्टा मंगोलियाको इर्चिमले प्रतियोगितामा भाग लिने अवसर पाएको थियो । एन्फाका कारण क्लब र नेपाली फुटबललाई ठूलो क्षति पुगेको ठहर गर्दै थ्री स्टारले ६ करोड रुपैयाँ क्षतिपूर्ती र दोषीमाथि कारवाहीको माग गर्दै आएको छ । एन्फा र थ्री स्टार पदाधिकारीबीच समस्या समाधानका लागि एकपटक अनौपचारिक बैठक बसेपछि सहमति बन्न नसकेको बताइएको छ ।

दोषीमाथि कारवाही हुन्छ भन्ने प्रश्नमा समितिका संयोजक खड्काले भने,‘समितिलाई छानविन गर्ने सम्मको जिम्मेवारी हो । हामीले यो विषयमा सबै विवरण र दोष कसको थियो, सबै उल्लेख गर्नेछौं । कारवाहीका विषयमा एन्फाको केन्द्रिय समितिले नै निर्णय गर्नुपर्ने हुन्छ ।’ समितिले आज एन्फा अध्यक्ष नरेन्द्र श्रेष्ठलाई प्रतिवेदन बुझाउनेछ । एन्फा अध्यक्ष श्रेष्ठ, महासचिव धिरेन्द्र प्रदान, सिइओ इन्द्रमान तुलाधर तथा कर्मचारी गोकुल थापा र बसन्त रिजालसँग एन्फा इमेलको पार्सवर्ड रहेको बताइएको छ । एन्फाले समिति गठन गर्नुबाहेक थ्री स्टारका विषयमा आधिकारिक धारणा सर्वजनिक गरेको छैन ।