एजेन्सी – नियमित कप्तान तथा फरवार्ड क्रिस्टियानो रोनाल्डोविनै पोर्चुगलले फिफा विश्वकप कतार २०२२ को तयारीस्वरुप खेलिएको अन्तर्राष्ट्रिय मैत्रीपूर्ण खेलमा सानदार जित निकालेको छ ।

पोर्चुगलले नाइजेरियामाथि ४–० को फराकिलो जित निकालेको हो । लिस्वनमा बिहीबार राति भएको एकपक्षीय खेलमा घरेलु टोली पोर्चुगलको जितमा ब्रुनो फर्नान्डेसले दुई तथा गोन्कालो रामोस र जाआओ मारियोले समान एक गोल गरे ।

खेलको नवौं मिनेटमा ब्रुनोको गोलबाट पोर्चुगलले अग्रता लियो । उनले डिएगो डालोटको पासमा गोल गर्न सफल भए । ३५औं मिनेटमा ब्रुनोले पेनाल्टीमार्फत गोल गर्दै पोर्चुगललाई पहिलो हाफमा २–० को अग्रता दिलाए ।

८२औं मिनेटमा परिवर्तित गोन्कालो रामोसले गोल गर्दै पोर्चुगललाई सहज जितर्फ अघि बढाए । ६६औं मिनेटमा आन्द्रे सिल्भाको स्थानमा मैदान छिरेका रामोसले राफयल गुरेइरोको पासमा गोल गर्न सफल भएका थिए ।

त्यसको २ मिनेटपछि अर्का परिवर्तित खेलाडी जोआओ मारियोले गोल गर्दै पोर्चुगललाई ४–० को सानदार जित दिलाए । दोस्रो हाफको शुरुमै बर्नाडो सिल्भाको स्थानमा मैदान छिरेका मारियोले रामोसको पासमा गोल गर्न सफल भएका थिए ।

अस्वस्थताका कारण रोनाल्डो नाइजेरियाविरुद्धको खेलमा टोलीमा थिएनन् । यस सानदार जितसँगै समूह ‘एच’ मा रहेको पोर्चुगलले विश्वकपको लागि तयार रहेको संकेत दिएको छ ।

पोर्चुगलले २४ नोभेम्वरमा घानासरुँग खेल्दै विश्वकपको शुरुवात गर्नेछ । त्यसपछि २८ नोभेम्वरमा उरुग्वे र २ डिसेम्वरमा दक्षिण कोरियासँग समूह चरणको अन्तिम खेल खेल्नेछ । नाइजेरिया विश्वकपमा छनोट हुन असफल टोली हो ।